Бруну Фернандеш «Манчестер Юнайтед»нинг энг кўп маоши олувчи футболчиларидан бирига айланмоқчи. Ҳозирда у Роналдудан 4 баробар кам маош олади

Ярим ҳимоячи Бруну Фернандеш «Манчестер Юнайтед» билан янги шартнома борасидаги музокараларни тўхтатди.

Португалиялик футболчининг ўтган мавсумдаги ёрқин ўйинларидан сўнг клуб унга янги шартнома таклиф қилган, раҳбарият Фернандешнинг маошини оширишга лойиқ деб ҳисоблайди.

The Athletic хабарига кўра, футболчи ва унинг вакиллари бу таклифни рад этган ҳамда музокаралар вақтинчалик тўхтатилган. Манбаларнинг таъкидлашича, бу масала бўйича мулоқот май ойида, Бруну ҳам, «Манчестер Юнайтед» ҳам клубнинг 2022/23 йилги мавсумдаги позициясини яхшироқ билганида тикланиши кутилмоқда.

Айни пайтда Фернандеш ҳафтасига, тахминан, 100 минг фунт маош олади. «Спортинг»да у ҳафтасига 50 минг фунт олган.

Жамоада энг юқори маошни Криштиану Роналду олади — ҳафтасига 400 минг фунтдан ортиқ. Давид Де Хеада эса бу кўрсаткич ҳафтасига 375 минг фунтга тенг. Пол Погба, Рафаэл Варан, Антони Марсьяль, Жейдон Санчо, Эдинсон Кавани ва Маркус Рэшфорд ҳафтасига 200 минг фунт ёки бундан кўпроқ олади. Ҳарри Магуайр ва Люк Шоунинг маошлари ҳам шу суммага яқин.

Бруну «Юнайтед»нинг ўйинига таъсирини ҳисобга олиб, жамоанинг энг кўп маош олувчи футболчилари билан тенг бўлишни хоҳламоқда.

«Манчестер Юнайтед» ҳозирги вазиятдан хавотирда эмас, чунки футболчининг амалдаги шартномаси 2025 йилнинг июнида якунига етади. Шунингдек, шартномада келишувни яна бир мавсумга узайтириш варианти ҳам бор.

Ярим ҳимоячи «Манчестер Юнайтед» сафида 2020 йилнинг январь ойидан бери ҳаракат қилиб қилмоқда. У шу вақтга АПЛда 70 та ўйинда майдонга тушиб, 33 та гол урди ва 22 та голли узатмани амалга оширди.