Буюк Британия бош вазири Борис Жонсон 2020 йил май ойида Лондонда Даунинг-стритдаги бош вазир қароргоҳининг боғида ўтказилган зиёфатда қатнашганини тасдиқлади. Ўша пайтда мамлакатда коронавирус туфайли биринчи умуммиллий локдаун амал қилаётганди, деб ёзади BBC News.
Жамоатлар палатасида нутқ сўзлаган Жонсон ўша пайтда локдаун остида бўлган одамлардан узр сўради:
«Мен узр сўрамоқчиман. Бутун мамлакат бўйлаб миллионлаб одамлар ўтган 18 ой ичида ақл бовар қилмайдиган қурбонлик қилганини биламан. Улар нималарни бошдан кечирганини тушунаман: одамлар яқинларини дафн қила олмади, ўзлари истагандек яшай олмади, севган ишлари билан шуғуллана олмади. Улар мендан ва мен раҳбарлик қилаётган ҳукуматдан қанчалик ғазабланишини биламан, чунки одамлар коронавирус қоидаларини ишлаб чиққанларнинг ўзи Даунинг-стритда уларга риоя қилмаяпти, деган фикрда», — деди Жонсон.
Британия бош вазирининг айтишича, 2020 йил 20 май куни зиёфат бўлиб ўтаётганда у ўз қароргоҳи боғига чиқиб, ходимларга миннатдорлик билдирган, 25 дақиқадан сўнг кабинетига қайтиб, ишлашда давом этган. Жонсон буни ишга оид тадбир деб ўйлаганини айтди. Ҳозир унинг фикрича, ўшанда зиёфатни тўхтатиши керак эди.
Лейбористлар партияси етакчиси Кей Стармер Борис Жонсондан ўзининг «беҳуда» баҳоналари ва «кулгили» ёлғонлари туфайли истеъфога чиқишни талаб қилди.
2020 йил май ойида Даунинг-стритда зиёфат уюштирилгани ҳақида биринчи марта 2022 йилнинг январь ойида оммага маълум бўлганди. ITV ва BBC News маълумотларига кўра, бош вазир қароргоҳидаги зиёфатга 100 га яқин одам таклиф қилинган, бироқ бор-йўғи 30 киши, жумладан, Борис Жонсон ҳам келган.
2021 йил декабрь ойида Британия ҳукуматида бош вазир идорасининг аъзолари Даунинг-стритда уюштирилган зиёфатни изоҳлаш тўғрисидаги ҳазили акс этган видео туфайли можаро чиқди. Борис Жонсон видео учун узр сўраган ва ички текширув ўтказишни буюрган. Видеога тушган Жонсон офисининг ходими Аллегра Страттон истеъфога чиққан.
Изоҳ (0)