“Milliy tiklanish” partiyasi yetakchisi Alisher Qodirov Tarbiya va ta’lim vazirligini tuzish lozimligini bildirdi. Bu haqda u ijtimoiy tarmoqdagi sahifasida ma’lum qildi.
“Tarbiya va ta’lim vazirligi tashkil etilib, vazirning uchta: oila va xotin-qizlar masalalariga mas’ul, bog‘chada tarbiya va boshlang‘ich ta’limni tashkil etishga mas’ul, maktabda ta’lim va tarbiyani tashkil qilishga mas’ul o‘rinbosarlari bo‘lishi taklif qilinadi.
Bu vazirlik har bir bola uchun oiladan boshlab maktabdan chiqib ketgunicha (tug‘ilganidan 18 yoshgacha) bo‘lgan davrda tarbiyasi va ta’lim sifati uchun mas’ul bo‘ladi. Vazirlikka ota-onalar bilan yaqindan ishlash, ularning malakasini oshirish bilan birga, mas’uliyatsizlik uchun javobgarlikka tortishni tashabbus qilish vakolatlari ham berilishi kerak”, — deyiladi taklifda.
Eslatib o‘tamiz, 2021-yilgi prezidentlik saylovlarida “Milliy tiklanish” partiyasi nomzodi Alisher Qodirov saylovchilar bilan muloqotda migrantlardan ham soliq undirish taklifini bildirgandi. “Kelinglar, endi yana ham vatanparvarroq bo‘laylik, migrantlar ham o‘zining solig‘ini mamlakat taraqqiyoti uchun to‘lasin”, — degandi u. O‘shanda prezident Shavkat Mirziyoyev migrantlarning o‘z oilasiga bergan ko‘magini, daromad deb soliqqa tortib bo‘lmasligini ta’kidlagan edi.
Izoh (0)