Yurtimizdagi mahallalarda olib borilayotgan obodonchilik ishlarini qo‘llab-quvvatlash bilan birga, aholini qiynayotgan ba’zi muammo va kamchiliklarni yoritib borish maqsadida “Daryo” “Noobod mahalla” loyihasini yo‘lga qo‘ydi.
Loyihamiz nishonidagi birinchi mahalla — Sergeli tumanidagi “So‘g‘diyona” mahallasi.
Biz tasvirga olish guruhimiz bilan mazkur mahallaga borib, u yerdagi muammolarni o‘rganib chiqdik.
Belgilangan manzilga yetib kelganimizda, juda ham ayanchli manzaraga guvoh bo‘ldik. Yo‘l tugab, botqoq boshlandi. Buning ustiga, mana shu botqoqning bir cheti axlatxonaga ham aylanib ketgan. Bu yurtimizning chekka bir viloyati emas, poytaxtdagi mahallada kuzatilayotgan holat.
4 oy avval, 2020-yilning sentabr oyida “So‘g‘diyona” mahallasining ichki ko‘chalari asfalt qilingan. Bu haqida Sergeli tumani hokimiyatining Facebook’dagi rasmiy sahifasida fotohisobot ham bor.
Ammo o‘shanda negadir ba’zi ko‘chalarning ma’lum qismi asfaltdan bebahra qolib ketgan. Masalan, Zarunar 2-tor ko‘chasidagi 70 metr masofadagi hududda asfalt yo‘q. Mazkur ko‘chani asfalt qilishga mas’ul bo‘lgan pudratchi tashkilot xodimi Doniyor Usmonov biz bilan suhbatda bu yerga qachon asfalt yotqizilishini ma’lum qildi.
Bu ko‘chani asfalt qilish 2021-yilning dekabr oyida rejaga kiritilgan. Ammo yog‘ingarchiliklar sababidan yerlar nam bo‘lgani tufayli ishlar to‘xtab qolgandi. Hozir yer qurishini kutyapmiz. Havo isib, namlik ketishi bilan asfalt yotqizamiz.Doniyor Usmonov, “Yo‘lko‘prikta’mir” MChJ xodimi
Mahalla hududidagi botqoqqa aylangan boshqa ichki yo‘llar bo‘yicha mahalla raisi Ahmadjon Komiljonov izoh berib o‘tdi.
Bu yo‘llarni hozircha asfalt qilishning ilojisi yo‘q. Sababi yo‘l bo‘yidagi uy-joylar qurilishi va ta’miri hali yakunlanmagan. Bu yerga 40-50 tonnalik texnikalar kirib-chiqadi. Kirgandan keyin asfaltni “o‘ynatib” yuboradi. Shu sababli hozircha bu yerga shag‘al to‘kib qo‘yish rejalashtirilgan.Ahmadjon Komiljonov, “So‘g‘diyona” MFY raisi
Shuningdek, belgilanmagan joylarga chiqindilarni tashlab ketish muammosi ham “So‘g‘diyona” mahallasi aholisini anchadan beri qiynab kelyapti. Xususan, Zarunar ko‘chasiga kiraverishidagi hudud mahalla raisi va fuqarolar tomonidan bir necha bor tozalanganiga qaramay, bu yerga axlat tashlash yana davom etmoqda. Tashlangan chiqindilar yoqimsiz hid manbasi bo‘lish bilan birga, atrofga kasallik tarqalishiga ham sabab bo‘lishi hech kimga sir emas.
Mahalla raisi Ahmadjon Komiljonov bu muammoni hal qilish uchun hududga kuzatuv kameralari o‘rnatilishini aytib o‘tdi.
Mahallani chiqindilardan tozalaganimizga hali bir oy ham bo‘lgani yo‘q. Hamma ko‘chalarni “chinnidek” qilib qo‘ygandik. Ammo odamlar yana axlat tashlamoqda. Bu yog‘i odamlarning o‘ziga bog‘liq. Buni begonalar emas, shu yerda yashaydiganlar qiladi. Endi axlat tashlanayotgan ko‘chalarga kuzatuv kameralari o‘rnatamiz. Hudud to‘liq nazoratda bo‘ladi.“So‘g‘diyona” mahallasini piyoda aylanib, yana bir holatga e’tibor qaratdik. Asfalt qilingan ko‘chalarda kanalizatsiya quduqlarining qopqoqlari yo‘q. Uning o‘rniga tosh bostirib qo‘yilgan, bu esa mashinalar harakatlanishida xavf tug‘dirmoqda.Ahmadjon Komiljonov, “So‘g‘diyona” MFY raisi
Shuningdek, yotqizilganiga ko‘p bo‘lmagan asfalt allaqachon yorilishni boshlagan.
“So‘g‘diyona” mahallasida anchadan beri hal bo‘lmay kelayotgan yana bir muammo — yorilgan suv quvurlari. Ulardan toza ichimlik suvi sizib chiqib, isrof bo‘lmoqda.
5 yildan beri “truba”larni yangilaymiz deyishadi, lekin kelishmaydi. “Vodokanal” ham bezor bo‘lib qolgan. Chaqirsak darrov: “Beton ko‘chami?” deb so‘rashadi. Lekin natija yo‘q.Usmon Xiziraliyev, “So‘g‘diyona” mahallasi fuqarosi
Mahalla raisi Ahmadjon Komiljonov kanalizatsiya quduqlari qopqoqlari va yorilgan quvurlar bo‘yicha quyidagicha izoh berib o‘tdi.
U yerda bor-yo‘g‘i 3 dona “kolodes” qopqog‘i yetishmaydi, xolos. Shuniyam endi yozuv-chizuv qilib, xarid qilib berishlarini so‘rab o‘tirish to‘g‘ri bo‘lmasa kerak. Aholining o‘zi bilan gaplashib, pul yig‘ib, qopqoqlar sotib olamiz. Yorilgan suv quvurlari bo‘yicha esa biz ko‘p murojaat qilganmiz. Kelib yamashdi, xomutlar qo‘yishdi. Foydasi bo‘lmadi. “Suvsoz” rahbari shu yilning birinchi choragida quvurlarni almashtirib berishga va’da bergan.Umid qilib qolamizki, “So‘g‘diyona” mahallasidagi yuqorida tilgan olingan muammolar va’da qilingan vaqtlarda hal qilinadi va ushbu mahalla haqiqiy obod maskanga aylanadi.Ahmadjon Komiljonov, “So‘g‘diyona” MFY raisi
Agar sizning mahallangizda ham mana shunday muammolar bo‘lsa, bizga @daryo_livebot orqali murojaat qiling. Biz mutassaddilarning e’tiborini mazkur muammolarga qaratishga va ularning yechimini izlashga urinib ko‘ramiz.
Izoh (0)