Axborot texnologiyalari va kommunikatsiyalarini rivojlantirish vaziri Sherzod Shermatov O‘zbekistonda qishki ta’til kunlari 24-yanvarga qadar uzaytirilgani munosabati bilan yoshlarga shug‘ullanish uchun dasturlash va chet tilini o‘rgatuvchi bepul platformalar bilan bo‘lishdi.
Bo‘sh vaqtingizda faqat o‘z ustingizda ishlashga harakat qilsangiz, muvaffaqiyatga erishishingiz aniq!Eslatib o‘tamiz, O‘zbekistonda talaba va o‘quvchilar uchun qishki ta’til 25-dekabrdan boshlangan edi. Ta’til 2022-yilning 10-yanvarigacha davom etishi va dars jarayonlari 11-yanvardan boshlanishi belgilangandi. Keyinroq oliy ta’lim muassasalarining talabalari, akademik litsey va hunar maktablari o‘quvchilari uchun qishki ta’til muddati 24-yanvargacha uzaytirildi. Keyinchalik umumta’lim maktablari va xususiy maktablarda ham qishki ta’til 24-yanvargacha uzaytirildi.Ma’lumot uchun, 2019-yilning noyabrida One Million Uzbek Coders (“Bir million o‘zbek dasturchilari”) bepul onlayn kurslari ochilgan. Kurslar Birlashgan Arab Amirliklari hukumati, O‘zbekiston Axborot texnologiyalari va kommunikatsiyalarini rivojlantirish vazirligi, Toshkent shahridagi Inha universiteti va IT-Park qoshidagi IT-akademiya ko‘magida tashkil etilgan.Yangi yil arafasida ko‘pchilik ko‘p narsalarni niyat qiladi, keyinchalik esa o‘sha niyatlarini amalga oshirish bo‘yicha aniq reja va harakat bo‘lmaganidan keyin ularning sekin-asta armonga aylanib borish xavfi bor.
Prezidentning yangi yildagi ilk tashriflarida yoshlar bilan uchrashuvda aytgan gaplari, nafaqat “Temurbeklar maktabi”dagi yoshlarga, balki barcha yoshlarimizga taalluqlidir. Shuning uchun bu gaplarni barcha yoshlarimiz yana bir bor diqqat bilan eshitib, bugundan boshlab qo‘ygan maqsadlari sari qattiq harakat qilishlari o‘zlari uchun faqat foyda keltiradi.
Aks holda, yillar o‘taveradi, niyatlar sarobga aylanaveradi va oxir-oqibat ko‘pchilik muvaffaqiyatga erishmaganlarga o‘xshab, o‘zining hayotidagi muvaffaqiyatsizligida o‘zidan boshqa hammani ayblash bilan ovora bo‘lib qolish xavfi paydo bo‘ladi (masalan, ota-onam buni qilib bermagan, o‘qituvchim yaxshi e’tibor qilmagan, boshlig‘im yordam bermagan, anavi qarindoshim yordam bermagan, davlat yomon va hokazo). Lekin bu bilan o‘zining hayoti yaxshi bo‘lib qolmasligi aniq.
Shu sababli, kelinglar qo‘shimcha ta’til vaqtini ham o‘zimiz uchun foydaliroq qilib o‘tkazaylik. Internetda bekorga vaqt sarflashning o‘rniga, chet tillarini tekinga o‘rgatadigan “Duolingo.com”dan va dasturlashni tekinga o‘rgatadigan “Code.org” yoki “Uzbekcoders.uz”dan ko‘proq foydalaning.
Agar tekinga o‘zingiz o‘rganishga zeriksangiz va pulini to‘lab guruh bo‘lib o‘rganmoqchi bo‘lsangiz, IT-Park hududiy markazlarida yoki uning ta’lim xizmatlarini ko‘rsatadigan rezidentlariga borib malakangizni oshiring (to‘liq ro‘yxat bilan quyidagi havola orqali tanishish mumkin).
Bu esa bo‘sh vaqtingizni kelajak uchun eng yaxshi sarmoyaga aylantirish demakdir! Agar o‘z ona tilingizga qo‘shimcha chet tillarida ravon so‘zlasha olsangiz hamda axborot texnologiyalarining turli sohalari bo‘yicha mutaxassis bo‘lsangiz, kelajakda qaysi sohada yoki qaysi hududda ishlashingizdan qat’iy nazar, muvaffaqiyatga erishish imkoniyatingiz albatta yuqoriroq bo‘ladi!
Sherzod Shermatov, axborot texnologiyalari va kommunikatsiyalarini rivojlantirish vaziri
Izoh (0)