Toshkent viloyati Angren shahridan oqib o‘tuvchi soydan 71 yoshli fuqaroning jasadi topildi. Bu haqda Bosh prokuratura matbuot xizmati “Daryo”ga ma’lum qildi.
Ma’lum qilinishicha, R.A. ismli ushbu fuqaroning jasadi 10-yanvar kuni soat 12:15 larda eski Angren IESga qarashli dam olish maskanining pastki tomonidan oqib o‘tuvchi soydan topilgan.
Hodisa joyiga Angren shahar prokurori o‘rinbosari, shahar prokuraturasi katta tergovchisi, IIB boshlig‘i hamda tezkor guruh xodimlari yetib borgan.
Holat yuzasidan sudga oid tibbiyot ekspertizasi tayinlangan bo‘lib, dastlabki ma’lumotlarga ko‘ra, R.A.ning o‘limiga “umumiy tashqi muhitdagi past harorat ta’sirida organizmning umumiy sovuq qotishi, miya va o‘pka shishi, o‘tkir yurak-qon tomir va nafas yetishmovchiligi” sabab bo‘lgan.
Hozirda mazkur holat yuzasidan shahar prokuraturasi tomonidan tergovga qadar tekshiruv harakatlari olib borilmoqda.
Avvalroq Bosh prokuratura g‘uzorlik erkak o‘limi ortidan qo‘shimcha tekshiruv boshlangani, Toshkent viloyatida 8 yil oldin bedarak yo‘qolgan qiz jasadi topilgani to‘g‘risida xabar berilgandi.
Izoh (0)