Avvalroq koronavirus tashxisi qo‘yilgan AQSh Mudofaa vaziri Lloyd Ostinning COVID-19 ga topshirgan navbatdagi testi manfiy chiqdi. U 10-yanvardan ishga qaytadi, deya ma’lum qilgan Pentagon matbuot kotibi Jon Kirbi Twitter’da.
“Mudofaa vaziri bugun COVID-testidan manfiy natija bilan o‘tgani va ertaga o‘z kabinetiga qaytayotganini mamnuniyat bilan e’lon qilaman. U virus ta’sirini yumshatishda vaksinalarning ahamiyatini qadrlaydi”— deb yozgan Pentagon vakili 9-yanvar kuni.
Kirbining ta’kidlashicha, 68 yoshli Ostin mutaxassislarning tavsiyalariga amal qilishda davom etadi. 6-yanvar kuni Ostinning o‘zi avval koronavirusga qarshi emlangani tufayli unda kasallik ancha yengilroq shaklda o‘tayotganini aytgan.
Lloyd Ostinda 2-yanvar kuni koronavirus aniqlangan edi. Shu bilan birga, u Mudofaa vaziri vakolatlarini boshqa birovga o‘tkazmagani va “imkon qadar” virtual formatdagi muhim tadbirlarda ishtirok etish niyatidaligini bildirgan. Yuzma-yuz uchrashuvlarda uning o‘rniga vaqtincha AQSh Mudofaa vazirining birinchi o‘rinbosari Ketlin Xiks vakillik qilgan.
Kirbi avvalroq Ostin koronavirus bilan og‘riganiga qaramay faol ishlashda davom etayotgani, uning ahvoli shifokorlarni xavotirga solmayotganini ta’kidlagan. Uning so‘zlariga ko‘ra, Pentagon rahbarini ko‘rikdan o‘tkazish uchun AQSh poytaxti chekkasidagi Uolter Rid nomli harbiy tibbiyot markaziga olib borishning ham keragi bo‘lmagan. “U uyda tuzalmoqda”, — deb bildirgan Kirbi.
Avvalroq AQSh razvedkasining minglab xodimlari emlanishdan bosh tortgani uchun ishdan bo‘shatilishi mumkinligi, Oq uy matbuot kotibi Jen Psaki koronavirusga chalingani to‘g‘risida xabar berilgandi.
Izoh (0)