“Roskosmos” Apofis asteroidining Yer bilan to‘qnashuvi ehtimolini “juda past” deb baholamoqda. Bu haqda “RIA Novosti” xabar berdi.
“Roskosmos” o‘z xulosasida Amaliy matematika instituti ma’lumotlariga tayangan. 2021-yilda institut 106 ta asteroid va 31 ta kometa ustidan 5797 ta o‘lchov ishlari olib borgan.
“Kuzatuvlar natijalari Apofisning orbital harakati parametrlarini aniqlab berdi. Bu uning Yerga yaqinlashishi haqidagi uzoq muddatli prognozlarga ishonchni oshirdi. Natija to‘qnashuv ehtimoli juda-juda kichik”, — deyiladi muassasa xabarida.
Olimlar, shuningdek, yangi 2021 UL17 asteroidi Yerga yaqinlashib kelayotgani aniqlangani haqida ma’lumot olgan. Dastlabki hisob-kitoblarga ko‘ra, u 2095-yil 5-aprelda sayyoraga xavfli darajada yaqinlashish mumkin. Hozircha to‘qnashuv ehtimoli 0,02 foiz.
Apofis asteroidi 2004-yilda kashf etilgan. Olimlar uning 2068-yilda Yer bilan to‘qnashishiga ishongandi, biroq NASA keyingi 100 yilda hech qanday xavf yo‘qligini ma’lum qilgan.
Dekabr oyi o‘rtalarida NASA yangi Sentry-II asteroid monitoringi texnologiyasini, shuningdek, Eyes on Asteroids saytini taqdim etdi, bu yerda shu paytgacha topilgan asteroidlarning barchasi haqida ma’lumot olish mumkin. Ma’lumotlar doimiy ravishda yangilanadi. Agentlik shu tarzda foydalanuvchilarning obyektlar Yerga qanchalik yaqin uchishini real baholay olishiga umid qilmoqda, chunki ommaviy axborot vositalarida kosmik jismlar ko‘pincha xavfli deb ataladi.
Izoh (0)