Belgiya va Chexiyada minglab odamlar aholini majburiy vaksinatsiya qilish va cheklov choralariga qarshi norozilik bildirish maqsadida ko‘chalarga chiqdi, deb xabar beradi Deutsche Welle.
AFP’ning ma’lumotlariga ko‘ra, 9-yanvar kuni Bryusselda bir necha ming kishi qo‘llariga majburiy vaksinatsiyaga qarshi plakatlarni ko‘tarib olgan holda Yevropa dahasiga qadar marsh yurgan. Oldingi aksiyalardan farqli o‘laroq, bu safargi namoyish asosan tinch o‘tgani aytilmoqda.
Politsiyaning ma’lum qilishicha, namoyishlarda 5 mingga yaqin odam ishtirok etgan. Ularning qariyb 40 nafari qo‘lga olingan. Namoyishchilar asosan restoranlar, barlar va madaniy tadbirlarga kirish uchun talab qilinayotgan vaksinatsiya pasportlariga qarshi norozilik bildirgan.
Pragada esa 4 mingga yaqin namoyishchilar 9-yanvar kuni majburiy vaksinatsiyaga qarshi norozilik bildirdi. 8-yanvar kuni 2 mingga yaqin odam Brno shahrida mitingga to‘plangan.
Andrey Babish boshchiligidagi oldingi hukumat Chexiyaning 60 yoshdan katta bo‘lgan barcha fuqarosini COVID-19 ga qarshi majburiy emlash bo‘yicha qaror qabul qilgan. U martdan boshlab kuchga kiradi. Pyotr Fiala rahbarligidagi yangi Vazirlar Mahkamasi majburiy vaksinatsiya bo‘yicha hozircha yakuniy qaror qabul qilmagan.
Avvalroq Italiyada 50 yoshdan oshganlar uchun COVID-19 ga qarshi majburiy emlash joriy qilingani to‘g‘risida xabar berilgandi. Mamlakatda 50 yoshdan oshgan ishchilardan emlanganini yoki yaqinda COVID-19 dan tuzalganini tasdiqlovchi tibbiy kuponlarni ko‘rsatish talab qilinadi. Aks holda, ular fevral oyining o‘rtalarida ishdan chetlatilishi mumkin. Bungacha emlanmagan odamlar har ikki kunda COVID-19 ga topshirgan testining manfiy natijasini taqdim etgandagina ishga chiqishi mumkin edi.
Izoh (0)