Braziliya sharqidagi Furnash ko‘lida qoyaning bir qismi qulab tushishi oqibatida halok bo‘lganlar soni o‘n nafarga yetdi, deb xabar bermoqda “RIA Novosti”.
Oldinroq sakkiz kishi halok bo‘lgani haqida xabar berilgan. Yana ikki kishi bedarak yo‘qolgan deb hisoblanmoqda.
“So‘nggi ikki jasad topildi. Bu ma’lumotni qutqaruvchilar ham tasdiqladi. Jami 10 kishi halok bo‘lgan”, — deyiladi xabarda.
Minas-Jerayis shtatida joylashgan ko‘ldagi baxtsiz hodisa 8-yanvar kuni yuz bergandi. O‘shanda 30 dan ortiq sayyohlar bir nechta turistik qayiqlarda ko‘ldagi sharsharani ko‘zdan kechirayotgan paytda qoyaning bir qismi ularning ustiga qulagan.
Shtat qutqaruv xizmati matbuot kotibi Pedro Ayixaraning so‘zlariga ko‘ra, mintaqada ikki hafta davom etgan yog‘ingarchilik kuchli eroziyaga uchragan qoyalarning qulashiga sabab bo‘lgan.
Avvalroq Turkiyada sayyohlar bilan ekskursiya uyushtirayotgan qayiq cho‘kib ketgandi. Hodisa oqibatida 2 yoshli bola halok bo‘lgan.
Izoh (0)