Bronksdagi ko‘p qavatli turar joy binosida sodir bo‘lgan yong‘in oqibatida 19 kishi halok bo‘ldi. Bu haqda Nyu-York meri Erik Adams ma’lum qildi, deb xabar beradi Associated Press agentligi.
“Ayni vaqtda bizda 19 kishi halok bo‘lgani tasdiqlandi va yana bir necha kishi og‘ir ahvolda”, — deydi u.
Uning so‘zlariga ko‘ra, halok bo‘lganlar orasida bolalar ham bor. Adamsning aniqlik kiritishicha, yong‘in 19 qavatli binoda sodir bo‘lgan. Mer yong‘inni shaharda so‘nggi 10 yillikda sodir bo‘lgan eng halokatli yong‘inlardan biri deb atagan.
The New York Times ma’lumotlariga ko‘ra, yong‘in qurbonlari orasida to‘qqiz nafar bola ham bor. Nyu-York hukumatining ma’lum qilishicha, 60 dan ortiq odam jabrlangan bo‘lib, ularning beshtasida Bronks shifoxonasiga yotqizilgan.
Yong‘inni o‘chirishga 200 ga yaqin o‘t o‘chiruvchi jalb etilgan. Shahar yong‘in o‘chirish xizmati komissari Daniel Nigro brifing vaqtida yong‘in nima sababdan yuzaga kelganini ochiqlamagan. Uning so‘zlariga ko‘ra, yong‘in boshlangan kvartira eshigi ochiq qoldirilgani sabab, tutun butun bino bo‘ylab tarqalgan. “O‘t o‘chiruvchilar zinapoyalarning har bir qavatida qurbonlarni topdi”, — deydi Nigro.
Keyinroq u yong‘in uchinchi qavatdagi kvartiralardan birining yotoqxonasiga o‘rnatilgan nosoz isitgich sabab yuzaga kelgan bo‘lishi mumkinligini aytgan. NYT’ning yozishicha, yong‘in 1972-yilda qurilgan binoda sodir bo‘lgan, unda 120 ta kvartira joylashgan.
Mahalliy amaldorlar mazkur yong‘inni 1990-yili Bronksdagi Happy Land tungi klubida sodir bo‘lgan fojiaga qiyoslamoqda. O‘shanda yong‘in 87 kishining umriga zomin bo‘lgandi.
Avvalroq Bangladeshdagi paromda sodir bo‘lgan yong‘in oqibatida kamida 30 kishi halok bo‘lgani, Nigeriyadagi maktabda sodir bo‘lgan yong‘inda 25 bola halok bo‘lgani to‘g‘risida xabar berilgandi.
Izoh (0)