Аввалроқ коронавирус ташхиси қўйилган АҚШ Мудофаа вазири Ллойд Остиннинг COVID-19 га топширган навбатдаги тести манфий чиқди. У 10 январдан ишга қайтади, дея маълум қилган Пентагон матбуот котиби Жон Кирби Twitter’да.
«Мудофаа вазири бугун COVID-тестидан манфий натижа билан ўтгани ва эртага ўз кабинетига қайтаётганини мамнуният билан эълон қиламан. У вирус таъсирини юмшатишда вакциналарнинг аҳамиятини қадрлайди»— деб ёзган Пентагон вакили 9 январь куни.
Кирбининг таъкидлашича, 68 ёшли Остин мутахассисларнинг тавсияларига амал қилишда давом этади. 6 январь куни Остиннинг ўзи аввал коронавирусга қарши эмлангани туфайли унда касаллик анча енгилроқ шаклда ўтаётганини айтган.
Ллойд Остинда 2 январь куни коронавирус аниқланган эди. Шу билан бирга, у Мудофаа вазири ваколатларини бошқа бировга ўтказмагани ва «имкон қадар» виртуал форматдаги муҳим тадбирларда иштирок этиш ниятидалигини билдирган. Юзма-юз учрашувларда унинг ўрнига вақтинча АҚШ Мудофаа вазирининг биринчи ўринбосари Кетлин Хикс вакиллик қилган.
Кирби аввалроқ Остин коронавирус билан оғриганига қарамай фаол ишлашда давом этаётгани, унинг аҳволи шифокорларни хавотирга солмаётганини таъкидлаган. Унинг сўзларига кўра, Пентагон раҳбарини кўрикдан ўтказиш учун АҚШ пойтахти чеккасидаги Уольтер Рид номли ҳарбий тиббиёт марказига олиб боришнинг ҳам кераги бўлмаган. «У уйда тузалмоқда», — деб билдирган Кирби.
Аввалроқ АҚШ разведкасининг минглаб ходимлари эмланишдан бош тортгани учун ишдан бўшатилиши мумкинлиги, Оқ уй матбуот котиби Жен Псаки коронавирусга чалингани тўғрисида хабар берилганди.
Изоҳ (0)