Uzbekistan Airways aviakompaniyasining Toshkentdan Buxoroga uchishi kerak bo‘lgan HY023/024 reysi kuchli tuman sabab kechiktirildi. Bu haqda Buxoro xalqaro aeroportiga tayanib, Telegram’dagi Bukhara News kanali xabar berdi.
Buxoro aeroportidagi kuchli tuman tufayli — ko‘rish masofasi 100 metr atrofida bo‘lib, aeroport ko‘ruvchanlik yaxshilangunga qadar samolyotlarni qabul qilish uchun yopilgan. Toshkent—Buxoro reysining parvozi mahalliy vaqt bilan soat 11:00 ga ko‘chirilgan.
Shuningdek, “Aeroflot” aviakompaniyasining Buxoro—Moskva yo‘nalishi bo‘yicha uchishi kerak bo‘lgan AFL-1877 sonli reysi ham noqulay ob-havo sharoiti sabab qoldirilgan. Mazkur reysda uchishi kerak bo‘lgan 133 nafar yo‘lovchi “Grand Buxoro” mehmonxonasiga joylashtirilgan. Ekipaj esa ish vaqti tugagani sabab dam olishga qaror qilgan.
Eslatib o‘tamiz, 3-yanvar kuni Urganch va Nukus aeroportlarida ko‘rish imkoniyati yomonligi sababli samolyotlar uchish va qo‘nishni amalga oshira olmagan edi. 6-yanvar kuni Toshkentdan uchgan ikkita samolyot tuman sabab belgilangan aeroportlarga qo‘na olmagan. 7-yanvar kuni esa kuchli tuman O‘zbekistondagi bir qancha aeroportlar faoliyatini cheklab qo‘ygandi.
Izoh (0)