Navoiy viloyati Qiziltepa tumanida 7-yanvar kuni ichki ishlar xodimi bo‘lmagan bir guruh shaxslar niqob va bitalarda xizmat olib borgani, yollanma inspektorlar va hududdagi baliq ovchilari o‘rtasida tortishuv yuzaga kelgani aniqlangandi. Viloyat Ichki ishlar boshqarmasi holat bo‘yicha qo‘shimcha ma’lumot berdi.
Qayd etilishicha, shu kuni soat 08:00 larda Qiziltepa tumani To‘dako‘l suv havzasida faoliyat olib boruvchi Golden like fish MChJga tegishli baliqchilik bazasida ushbu MChJda o‘zaro shartnomada ko‘rsatilgan tartibda, ya’ni qora rangli liboslar kiyib yuzlariga niqob taqqan holda qo‘llariga rezina tayoqlar bilan xizmat olib borayotgan nazoratchi inspektorlar va shu havzada baliq ovlovchi ovchilar o‘rtasida kelishmovchilik yuzaga kelgan.
Nazoratchi inspektorlar ovchilarni ichkariga kirishi uchun pasport nusxasi talab qilgan. Baliqchilar norozi bo‘lib, yollanma ishchilarning xizmat faoliyatiga to‘sqinlik qilgan va jamoat tartibini buzgan.
Aniqlanishicha, qora rangli liboslar kiyib, yuzlariga niqob taqqan holda, qo‘llariga rezina tayoqlar bilan xizmat olib borayotgan nazoratchi inspektorlar shartnoma asosidagi yollanma fuqarolar, Ichki ishlar xodimi emas. Ularning egnidagi libosi, vazirlik shevroni hamda rezina tayoqlarni qayerdan olgani yuzasidan tergovga qadar tekshiruv harakatlari o‘tkazilgan.
Fuqarolar o‘rtasida kelib chiqqan kelishmovchilik, tartibbuzarlik harakatlari va yuzaga kelgan janjal yuzasidan Jinoyat kodeksining 277-moddasi (bezorilik) bilan jinoyat ishi qo‘zg‘atilgan. Ayni paytda tergov harakatlari olib borilmoqda.
Mavzuga doir:
Izoh (0)