Chilonzor va Yashnobod tumanlarining ayrim hududlari 10-yanvarda 8 soatga gaz ta’minotidan uziladi. Bu haqda “Hududgaz Poytaxt” matbuot xizmati xabar qildi.
Ma’lum qilinishicha, Chilonzor tumani 20-A mavzeda joylashgan yerusti D-57 millimetr past bosimli gaz quvurini boshqa xavfsiz joyga ko‘chirish ishlari “Chilonzortumangaz” gaz ta’minoti bo‘limi tomonidan rejalashtirilgan. Shu sababli, 10-yanvar kuni soat 10:00 dan 18:00 gacha ushbu manzildagi 8 ta ko‘p qavatli uylarda hamda 2 ta ulgurji iste’molchilarida tabiiy gaz ta’minoti vaqtincha to‘xtatiladi.
Shuningdek, Yashnobod tumani 3-tor Mumtoz ko‘chasida joylashgan o‘rta bosim D-57 millimetr yerosti gaz quvurida hamda Ohangrabo ko‘chasida joylashgan D-50 millimetr o‘rta bosim gaz quvuridan gaz sizib chiqish holatlarini bartaraf qilish ishlari rejalashtirilgan. Shu sababli 10-yanvar kuni soat 10:00 dan 18:00 gacha D.Usmanova, Karimova, Uysozlar, Mumtoz, Ohangrabo, Chashma, Shavkat, Sadaf, Charos, Muloyim, Tabibiy hamda Tabassum ko‘chalaridagi aholi hamda ulgurji iste’molchilarida tabiiy gaz ta’minoti vaqtincha to‘xtatiladi.
“Hududgaz Poytaxt” gaz ta’minoti filiali yetkazilayotgan noqulayliklar uchun aholi va gaz iste’molchilaridan uzr so‘rab, ta’mirlash ishlari tugatilgandan so‘ng gaz ta’minoti qayta tiklanishini bildirgan.
Bundan bir kun avval Mirobod tumanining ayrim hududlarida ta’mirlash ishlari sabab gaz ta’minoti 7 soatga to‘xtatilgandi.
Izoh (0)