Toshkent shahar IIBB ijtimoiy tarmoqlarda Malibu avtomobili YPX inspektorining qonuniy talabiga bo‘ysunmagani aks etgan video yuzasidan ma’lumot berdi.
Ma’lum qilinishicha, 9-yanvar kuni taxminan soat 21:45 larda Toshkent shahar Chilonzor tumani Gavhar ko‘chasida xizmat olib borayotgan Toshket shahar IIBB YHXB YPX inspektori katta serjant A.Ismoilov tomonidan davlat raqami 01V 907 KB bo‘lgan Malibu avtomobiliga hujjatlarini tekshirish maqsadida hushtak va jezl tayoqchasi yordamida to‘xtash ishorasi berilgan. Biroq avtomashina haydovchisi YPX inspektorining to‘xtash haqidagi qonuniy talabiga bo‘ysunmay harakatini davom ettirgan.
YPX inspektorlarining ko‘rgan tezkor chora-tadbirlari natijasida avtomashina Bunyodkor va Cho‘ponota ko‘chalari chorrahasida joylashgan ko‘prik ustida to‘xtatilgan hamda haydovchi tomonidan sodir etilishi mumkin bo‘lgan boshqa og‘irroq oqibatlarning oldi olingan.
Aniqlanishicha, avtomashinani boshqargan fuqaro R.A.ning (1999-yilda tug‘ilgan) haydovchilik guvohnomasi, avtomashinani boshqarish uchun ishonchnoma va avtomashina oynalarini qoraytirish uchun tegishli ruxsatnomasi bo‘lmagan.
Haydovchiga nisbatan Ma’muriy javobgarlik to‘g‘risidagi kodeksning 126 (ko‘zgusimon va (yoki) tusi o‘zgartirilgan (qoraytirilgan) oynali, shuningdek, tevarak-atrofni ko‘rishni cheklaydigan qoplamali transport vositalaridan foydalanish), 135 (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi), 194-moddalariga (ichki ishlar organlari xodimining qonuniy talablarini bajarmaslik) asosan ma’muriy bayonnoma rasmiylashtirilib, avtomashina vaqtincha saqlash uchun jarima maydoniga joylashtirilgan.
Avvalroq Toshkentda YPX xodimlaridan qochgan Malibu haydovchisi qamoqqa olingani, uni to‘xtatishda o‘qotar qurol ishlatilgani to‘g‘risida xabar berilgandi.
Izoh (0)