O‘zbekistonda 2022-yil 1-yanvardan yana 13 ta xalqaro tizimda yuqori natijaga erishgan yoshlarning imtihon xarajatlarini kompensatsiya qilib berish tizimi ishga tushadi. Bu haqda Yoshlar ishlari agentligi direktori Alisher Sadullayev ma’lum qildi.
Qayd etilishicha, bu orqali imtihon tizimlari soni 18 taga yetdi. Xalqaro tizimlar arab, xitoy, fransuz, rus, ispan, koreys, yapon, italyan, turk va nemis tillari bo‘yicha imtihonlardagi xarajatlarni qoplab beradi.
Quyidagi shartlar to‘liq bajarilganda, ariza beruvchiga mazkur Reglamentda nazarda tutilgan kompensatsiya to‘lab beriladi:
- imtihonlarning biri yoki bir nechtasi bo‘yicha imtihon topshirish xarajati kompensatsiya qilinishi uchun to‘planishi lozim bo‘lgan yuqori ball (daraja)ning minimal ko‘rsatkichi yoki undan yuqori natija qayd etilganda;
- maxsus sertifikat berilgan sanadan boshlab 180 kalendar kun o‘tmasdan kompensatsiya to‘lashni so‘rab reglamentda belgilangan tartibda murojaat qilganda;
- maxsus sertifikatda ko‘rsatilgan imtihon natijasining haqiqiyligi va to‘g‘riligi Yoshlar ishlari agentligi tomonidan tasdiqlanganda.
Shunga asosan, 2021-yil aprelida Vazirlar Mahkamasining qarori bilan Xalqaro imtihon tizimlari bo‘yicha yuqori ball (daraja) olgan yoshlarga imtihon topshirish xarajatlarini to‘liq qoplab berishning ma’muriy reglamenti tasdiqlangan. Unga ko‘ra, 5 ta xalqaro imtihon tizimi (IELTS, TOEFL, GMAT, GRE, SAT) bo‘yicha kompensatsiyalar 2021-yil 1-maydan boshlab to‘lanadi, yana 13 ta imtihon tizimi bo‘yicha xarajatlar 2022-yil 1-yanvardan qoplanishni boshlaydi. Xarajatlarni qoplash uchun faqat imtihon topshirish paytida 31 yoshga to‘lmagan O‘zbekiston fuqarolari va O‘zbekistonda doimiy yashovchi fuqaroligi bo‘lmagan shaxslar Davlat xizmatlari markazlari yoki Yagona portal orqali murojaat qilishlari mumkin bo‘ladi.
Tizim ishga tushganidan buyon xalqaro imtihonlarda yuqori ball olgan 2833 nafar yoshga imtihon xarajatlari kompensatsiya qilingan. Bu uchun budjetdan 5,2 milliard so‘m sarflangan.
Izoh (0)