Ўзбекистонда 2022 йил 1 январдан яна 13 та халқаро тизимда юқори натижага эришган ёшларнинг имтиҳон харажатларини компенсация қилиб бериш тизими ишга тушади. Бу ҳақда Ёшлар ишлари агентлиги директори Алишер Садуллаев маълум қилди.
Қайд этилишича, бу орқали имтиҳон тизимлари сони 18 тага етди. Халқаро тизимлар араб, хитой, француз, рус, испан, корейс, япон, итальян, турк ва немис тиллари бўйича имтиҳонлардаги харажатларни қоплаб беради.
Қуйидаги шартлар тўлиқ бажарилганда, ариза берувчига мазкур Регламентда назарда тутилган компенсация тўлаб берилади:
- имтиҳонларнинг бири ёки бир нечтаси бўйича имтиҳон топшириш харажати компенсация қилиниши учун тўпланиши лозим бўлган юқори балл (даража)нинг минимал кўрсаткичи ёки ундан юқори натижа қайд этилганда;
- махсус сертификат берилган санадан бошлаб 180 календарь кун ўтмасдан компенсация тўлашни сўраб регламентда белгиланган тартибда мурожаат қилганда;
- махсус сертификатда кўрсатилган имтиҳон натижасининг ҳақиқийлиги ва тўғрилиги Ёшлар ишлари агентлиги томонидан тасдиқланганда.
Шунга асосан, 2021 йил апрелида Вазирлар Маҳкамасининг қарори билан Халқаро имтиҳон тизимлари бўйича юқори балл (даража) олган ёшларга имтиҳон топшириш харажатларини тўлиқ қоплаб беришнинг маъмурий регламенти тасдиқланган. Унга кўра, 5 та халқаро имтиҳон тизими (IELTS, TOEFL, GMAT, GRE, SAT) бўйича компенсациялар 2021 йил 1 майдан бошлаб тўланади, яна 13 та имтиҳон тизими бўйича харажатлар 2022 йил 1 январдан қопланишни бошлайди. Харажатларни қоплаш учун фақат имтиҳон топшириш пайтида 31 ёшга тўлмаган Ўзбекистон фуқаролари ва Ўзбекистонда доимий яшовчи фуқаролиги бўлмаган шахслар Давлат хизматлари марказлари ёки Ягона портал орқали мурожаат қилишлари мумкин бўлади.
Тизим ишга тушганидан буён халқаро имтиҳонларда юқори балл олган 2833 нафар ёшга имтиҳон харажатлари компенсация қилинган. Бу учун бюджетдан 5,2 миллиард сўм сарфланган.
Изоҳ (0)