Samarqand viloyatida ishga joylab qo‘yish uchun fuqarolardan pul talab qilgan mansabdorlar ushlandi. Bu haqda viloyat Ichki ishlar boshqarmasi xabar qildi.
Ma’lum qilinishicha, Davlat xavfsizlik xizmati Samarqand viloyati boshqarmasi va Iqtisodiy jinoyatlarga qarshi kurashish departamenti xodimlari 7-yanvar kuni tezkor tadbir o‘tkazgan. Unda Oqdaryo tuman tibbiyot birlashmasiga qarashli tez tibbiy yordam bo‘limining 30 yoshli xodimi “Yangiobod” mahallasida yashovchi fuqaroni shifoxonada hamshira vazifasiga ishga kiritib qo‘yishni va’da qilgani aniqlangan. U 700 dollar miqdoridagi pullarni olayotganda ashyoviy dalillar bilan ushlangan.
Bundan tashqari, Payariq tumanidagi maktab direktori lavozimida ishlovchi J.Sh. “Boshqo‘rg‘on” mahallasida yashovchi fuqaroni maktabning psixologiya fani o‘qituvchisi sifatida ishga olishini aytgan, evaziga 400 dollar miqdorida pul talab qilgan. U avans sifatida 900 ming so‘m olgan. Qolgan 3 million 200 ming so‘mni olayotgan vaqtda daliliy ashyo bilan qo‘lga tushgan.
Hozirda yuqoridagi shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Mavzuga doir:
- Qashqadaryoda ijtimoiy so‘rovnomada qatnashgan o‘qituvchilarning 42 foizi ishga kirish uchun direktorga pora berilishini ma'lum qilgan
- “Uchta ‘kal’ berasan, darslarni bir kunga qo‘yib beraman”. Qashqadaryoda maktab direktori dars sotishga urindi
- Qashqadaryoda sport maktabi direktori 1,5 mln so‘m pora olgani uchun 5 yilga ozodlikdan mahrum qilindi
Izoh (0)