O‘zbekistonda may oyidan buyon xalqaro imtihonlarda yuqori ball olgan yoshlarning imtihon xarajatlarini kompensatsiya qilish uchun 5,2 milliard so‘m sarflangan. Bu haqda Yoshlar ishlari agentligi Alisher Sadullayev xabar qildi.
Ma’lum qilinishicha, 2021-yil 1-maydan boshlab 5 ta turdagi xalqaro imtihon tizimlarida yuqori natija qayd etgan (IELTS – 7 va undan yuqori; TOEFL – 95 va undan yuqori; GMAT – 75 foiz va undan yuqori; GRE – 75 foiz va undan yuqori; SAT – 1200 va undan yuqori) natijani qayd etgan yoshlarning imtihon xarajatlari Yoshlar ishlari agentligi tomonidan to'liq kompensatsiya qilib berish boshlangan.
Shu kungacha bu imkoniyatdan foydalanish uchun 3488 nafar yoshlardan ariza kelib tushgan. Shundan 2833 nafariga imtihon xarajatlari kompensatsiya qilib berilgan. 2 ta ariza ko‘rib chiqish jarayonida, 169 ta yangi ariza kelib tushgan. 469 ta ariza esa rad etilgan. Buning sababi ushbu arizachilar mazkur tizim yo'lga qo‘yilishidan avval sertifikatni qo‘lga kiritishgan yoki yuqori natija (maksimal ballning 75 foizdan yuqorisini) qayd etmay murojaat qilgan.
“Istasangiz plastik kartaga, istasangiz, naqd shaklda pulingizni qaytarib olishingiz mumkin. Albatta, avvalo, yuqori natija qayd etish talab etiladi. Bu imkoniyatdan foydalanish uchun qayergadir borib murojaat qilish shart emas. Tizim raqamlashgan, my.gov.uz portali orqali onlayn ariza yuborish mumkin. my.gov.uz portalida ma’lumotlar doim yangilanib boradi. Shuningdek, siz ham buni doimiy ravishda ushbu havola orqali kuzatib borishingiz mumkin”, — deyiladi xabarda.
Eslatib o‘tamiz, 2020-yilning 25-dekabrida O‘zbekiston yoshlari forumida ishtirok etgan Prezident Shavkat Mirziyoyev xalqaro ta’lim dasturlari bo‘yicha eng yuqori ballarni to‘plagan yoshlarga imtihon topshirish xarajatlari to‘liq qoplab berilishini ma’lum qilgandi.
Shunga asosan, 2021-yil aprelida Vazirlar Mahkamasining qarori bilan Xalqaro imtihon tizimlari bo‘yicha yuqori ball (daraja) olgan yoshlarga imtihon topshirish xarajatlarini to‘liq qoplab berishning ma’muriy reglamenti tasdiqlangan. Unga ko‘ra, 5 ta xalqaro imtihon tizimi (IELTS, TOEFL, GMAT, GRE, SAT) bo‘yicha kompensatsiyalar 2021-yil 1-maydan boshlab to‘lanadi, yana 13 ta imtihon tizimi bo‘yicha xarajatlar 2022-yil 1-yanvardan qoplanishni boshlaydi. Xarajatlarni qoplash uchun faqat imtihon topshirish paytida 31 yoshga to‘lmagan O‘zbekiston fuqarolari va O‘zbekistonda doimiy yashovchi fuqaroligi bo‘lmagan shaxslar Davlat xizmatlari markazlari yoki Yagona portal orqali murojaat qilishlari mumkin bo‘ladi.
Izoh (0)