Toshkent shahrida 7-yanvar kuni YHX xodimlarining qonuniy talablariga bo‘ysunmay, qochishga uringan Malibu avtomobilni to‘xtatishda o‘qotar qurollardan foydalanilgandi. Shahar IIBBning ma’lum qilishicha, avtomobil haydovchisi qo‘lga olingan.
Qayd etilishicha, 7-yanvar kuni soat 15:00 larda Yunusobod tumani Yangi shahar ko‘chasi bo‘ylab kuchli darajada mast bo‘lgan fuqaro A.A. (1976-yilda tug‘ilgan) Malibu avtotransportida shu yerda xizmat o‘tayotgan YHX xodimlarining qonuniy talablariga bo‘ysunmasdan, o‘zgalarning hayoti va sog‘lig‘iga xavf solgan holda qochishga uringan.
Xodimlar haydovchining noqonuniy harakatlari natijasida yuzaga kelishi mumkin bo‘lgan og‘ir oqibatlarning oldini olish maqsadida belgilangan tartibda o‘qotar qurol qo‘llagan. Natijada avtotransport vositasi majburiy to‘xtatilib, haydovchi zararsizlantirilgan. Qurol qo‘llanilishi natijasida hech kim jarohatlanmagan.
Hozirda mazkur holat yuzasidan Yunusobod tumani prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilgan. Hozirda haydovchiga nisbatan qamoqqa olish tarzidagi ehtiyot chorasi qo‘llanilgan. Tergov harakatlari olib davom etmoqda.
Izoh (0)