AQSh Sharqiy Yevropadan o‘z qo‘shinlarini olib chiqish variantlarini ko‘rib chiqayotgani to‘g‘risida tarqalgan xabarlar noto‘g‘ri. Bu haqda Davlat departamentining rasmiy vakili Ned Prays Twitter’dagi sahifasi orqali ma’lum qildi.
“Administratsiya kelasi hafta Rossiya bilan muzokaralarga tayyorgarlik ko‘rish maqsadida AQSh qo‘shinlarini Sharqiy Yevropadan olib chiqib ketish variantlarini ishlab chiqayotgani haqiqatga to‘g‘ri kelmaydi”, — deb yozadi u. Praysning so‘zlariga ko‘ra, Davlat departamenti bu haqda ushbu ma’lumotni birinchi bo‘lib e’lon qilgan NBC telekanaliga ma’lum qilgan.
Qo‘shinlarning olib chiqib ketilishiga oid ma’lumot 7-yanvar kuni paydo bo‘ldi. NBC o‘z manbalariga tayanib, AQSh Rossiya bilan Boltiqbo‘yi mamlakatlari va Polshadagi qo‘shinlarini qisqartirishni muhokama qilishini yozgan. Bundan tashqari, har ikki tomon o‘tkazayotgan harbiy mashg‘ulotlar ko‘lamini qisqartirish va qo‘shinlar harakati to‘g‘risida o‘z vaqtida xabardor qilish masalalari ham ko‘tarilishi mumkin.
Shu bilan birga, NBC manbalari AQShning Sharqiy Yevropadagi harbiy ishtirokini har qanday qayta ko‘rib chiqish faqat Moskvaning javob qadamlari orqali amalga oshirilishi mumkinligini ta’kidlagan.
Maqola e’lon qilingach, telekanal unga Oq uyning milliy xavfsizlik bo‘yicha vakili Emili Xornning izohini ham qo‘shgan bo‘lib, u ham harbiy kontingentni qisqartirish rejasini rad etgan. Uning so‘zlariga ko‘ra, AQSh administratsiyasi Rossiya bilan Boltiqbo‘yi va Polshadagi harbiylar sonini muhokama qilmayapti.
Avvalroq AQSh Rossiya Ukrainaga bostirib kirsa, NATOning sharqiy qanotiga qo‘shin jo‘natishini ma’lum qilgandi. Britaniya Mudofaa vazirligi Rossiyadan himoya qilish uchun Ukrainaga qo‘shin yuborilishini ehtimoldan yiroq deb atagan. Rossiya prezidenti Vladimir Putin AQSh va NATO harbiy guruhlarining Rossiya chegaralari yaqinida joylashtirilishidan jiddiy xavotirda ekanini aytgan. Shuningdek, Pentagon AQSh harbiy kuchlarining dunyodagi joylashuv tartibida jiddiy o‘zgarish qilinmasligini, Yevropadagi harbiylarining sonini oshirishni rejalashtirmayotganini ma’lum qilgandi.
Izoh (0)