Eron transport vazirligi 2020-yil yanvarda mamlakat hududida Ukrainaning yo‘lovchi samolyotining havodan himoya kuchlari tomonidan urib tushirilishi oqibatida halok bo‘lganlarning oilalariga kompensatsiya to‘lanishi haqida xabar berdi, deb yozmoqda “Interfaks”.
Eron fuqarolik aviatsiyasi boshqarmasi ayrim oilalarga 150 ming dollardan pul to‘langanini bildirgan. Boshqarmaning qo‘shimcha qilishicha mazkur mablag‘ning to‘langanidan keyin halok bo‘lganlarning oila a’zolari sudga qayta murojaat qilib yana pul undirish huquqiga ega bo‘lmaydi. Qayd etilishicha, bu kabi takroran kompensatsiya olishga urinish holatlari Kanadada kuzatilgan.
Eron harbiylari xato tufayli 2020-yil 8-yanvarda Ukraina xalqaro avialiniyalari kompaniyasiga qarashli Tehrondan Kiyev tomon uchib ketayotgan Boeing 737 samolyotini urib tushirgan. Oqibatda 176 nafar yo‘lovchi va havo kemasi ekipajining 9 nafar a’zosi halok bo‘lgandi. Samolyot bortida Ukraina, Eron va Kanada va yana boshqa mamlakatlarning fuqarolari bo‘lgan.
2021-yil may oyida Ontario oliy sudi mazkur aviahalokatni terrorchilik harakati oqibatida yuz bergan hodisa deb topgan. 2020-yil iyulida Eron yanvar oyida urib tushirilgan Ukrainaning Boeing samolyoti uchun tovon to‘lashga rozi bo‘lgandi.
Avvalroq Kanada sudining Eron tomonidan urib tushirilgan samolyot yo‘lovchilarning oilalariga 107 mln dollar tovon puli undirish haqida hukm chiqargani xabar qilingandi.
Izoh (0)