АҚШ Шарқий Европадан ўз қўшинларини олиб чиқиш вариантларини кўриб чиқаётгани тўғрисида тарқалган хабарлар нотўғри. Бу ҳақда Давлат департаментининг расмий вакили Нед Прайс Twitter’даги саҳифаси орқали маълум қилди.
«Администрация келаси ҳафта Россия билан музокараларга тайёргарлик кўриш мақсадида АҚШ қўшинларини Шарқий Европадан олиб чиқиб кетиш вариантларини ишлаб чиқаётгани ҳақиқатга тўғри келмайди», — деб ёзади у. Прайснинг сўзларига кўра, Давлат департаменти бу ҳақда ушбу маълумотни биринчи бўлиб эълон қилган NBC телеканалига маълум қилган.
Қўшинларнинг олиб чиқиб кетилишига оид маълумот 7 январь куни пайдо бўлди. NBC ўз манбаларига таяниб, АҚШ Россия билан Болтиқбўйи мамлакатлари ва Польшадаги қўшинларини қисқартиришни муҳокама қилишини ёзган. Бундан ташқари, ҳар икки томон ўтказаётган ҳарбий машғулотлар кўламини қисқартириш ва қўшинлар ҳаракати тўғрисида ўз вақтида хабардор қилиш масалалари ҳам кўтарилиши мумкин.
Шу билан бирга, NBC манбалари АҚШнинг Шарқий Европадаги ҳарбий иштирокини ҳар қандай қайта кўриб чиқиш фақат Москванинг жавоб қадамлари орқали амалга оширилиши мумкинлигини таъкидлаган.
Мақола эълон қилингач, телеканал унга Оқ уйнинг миллий хавфсизлик бўйича вакили Эмили Хорннинг изоҳини ҳам қўшган бўлиб, у ҳам ҳарбий контингентни қисқартириш режасини рад этган. Унинг сўзларига кўра, АҚШ администрацияси Россия билан Болтиқбўйи ва Польшадаги ҳарбийлар сонини муҳокама қилмаяпти.
Аввалроқ АҚШ Россия Украинага бостириб кирса, НАТОнинг шарқий қанотига қўшин жўнатишини маълум қилганди. Британия Мудофаа вазирлиги Россиядан ҳимоя қилиш учун Украинага қўшин юборилишини эҳтимолдан йироқ деб атаган. Россия президенти Владимир Путин АҚШ ва НАТО ҳарбий гуруҳларининг Россия чегаралари яқинида жойлаштирилишидан жиддий хавотирда эканини айтган. Шунингдек, Пентагон АҚШ ҳарбий кучларининг дунёдаги жойлашув тартибида жиддий ўзгариш қилинмаслигини, Европадаги ҳарбийларининг сонини оширишни режалаштирмаётганини маълум қилганди.
Изоҳ (0)