“Kommersant” nashrining xabar berishicha, AQShning Yevropa davlatlarida harbiy ishtiroki faqat Ukraina atrofida vaziyat keskinlashgan taqdirdagina ortadi. Pentagon matbuot kotibi Jon Kirbining so‘zlariga ko‘ra, hozircha harbiylar sonini oshirish haqida gap yo‘q.
Brifing davomida Kirbi mintaqaga harbiylar faqat ikkita sharoitda yuborilishini aytdi: Ukrainadagi vaziyat keskinlashganda hamda AQShning NATO bo‘yicha ittifoqchilaridan yordam uchun tegishli so‘rov kelib tushganda.
“Hozircha ushbu ikki kutilmagan vaziyatning hech biri sodir bo‘lmadi”, — dedi Pentagon vakili.
AQSh Rossiya Ukrainaga bostirib kirsa, NATOning sharqiy qanotiga qo‘shin jo‘natishini ma’lum qilgandi. Britaniya Mudofaa vazirligi Rossiyadan himoya qilish uchun Ukrainaga qo‘shin yuborilishini ehtimoldan yiroq deb atagan. Rossiya prezidenti Vladimir Putin AQSh va NATO harbiy guruhlarining Rossiya chegaralari yaqinida joylashtirilishidan jiddiy xavotirda ekanini aytgan.
Avvalroq Pentagon AQSh harbiy kuchlarining dunyodagi joylashuv tartibida jiddiy o‘zgarish qilinmasligini ma’lum qilgandi.
Izoh (0)