Ozarbayjon prezidenti Ilhom Aliyev 2022-yilni mamlakatda “Shusha shahri yili” deb e’lon qilish to‘g‘risidagi farmoyishni imzoladi, deb xabar beradi “TASS”.
“Shusha shahrining Ozarbayjon xalqi uchun tarixiy ahamiyati, yuksak madaniy-ma’naviy qadriyatini hisobga olgan holda qaror qilaman: Ozarbayjonda 2022-yil Shusha shahri yili deb e’lon qilinsin”, — deyiladi hujjatda.
Farmoyishda qayd etilishicha, Shusha shahriga 1752-yilda Qorabog‘ xoni Panaxalixon tomonidan asos solingan va u joriy yilda o‘zining 270 yilligini nishonlaydi. Shahar “uzoq rivojlanish yo‘lini bosib o‘tgan va butun Janubiy Kavkazning madaniy hamda ijtimoiy-siyosiy hayotida alohida rol o‘ynagan”. Ta’kidlanishicha, 2020-yilning kuzida Qorabog‘da amalga oshirilgan jangovar harakatlar natijasida shahar Ozarbayjon nazorati ostiga o‘tgach, u yerda infratuzilmani qurish, tarixiy va madaniy yodgorliklarni qayta tiklash boshlangan.
Ma’lumot uchun, Tog‘li Qorabog‘dagi Shusha shahri 2020-yil noyabrida Ozarbayjon nazorati ostiga o‘tdi. Armaniston kuchlari tomonidan shaharning qo‘ldan berilishi kuzda avj olgan mojaroning so‘nggi voqealaridan biri bo‘ldi. Shusha strategik mavqega ega shahar bo‘lib, Tog‘li Qorabog‘ poytaxti Stepanakertdan 10 kilometr janubda joylashgan. Stepanakertni Armaniston bilan bog‘lovchi yo‘l mazkur shahardan o‘tadi. 90-yillarning boshida kechgan Qorabog‘dagi birinchi urush paytida shahar jiddiy zarar ko‘rgan. Hozirgi kunda Shusha aholisi 4 ming kishidan sal ko‘proq.
Shusha vayron qilinganidan so‘ng darhol Moskva vositachiligida Yerevan va Boku mojaroni to‘xtatish to‘g‘risida kelishuvga erishdi. Unga muvofiq Tog‘li Qorabog‘ning muhim qismi Ozarbayjon harbiylari nazorati ostiga o‘tdi va tinchlik shartnomasiga rioya etilishini nazorat qilish Rossiya tinchlikparvar kuchlariga topshirildi.
Izoh (0)