“Tolibon” o‘zining yangi Vazirlar Mahkamasi tarkibiga ag‘darilgan hukumat a’zolarini qo‘shmaydi. Bu haqda Afg‘oniston bosh vaziri o‘rinbosari mulla Abdulg‘ani Barodarga tayanib, TOLOnews telekanali xabar berdi.
Barodarning so‘zlariga ko‘ra, AQSh toliblarga mamlakat sobiq hukumatining ayrim a’zolarini ismlarini taqdim etib, ularni amaldagi Vazirlar Mahkamasi tarkibiga kiritish, shu orqali hukumatni koalitsiyaga aylantirishni ma’lum qilgan. Biroq mullaning aytishicha, bu amalga oshmaydi.
Mulla Abdulg‘ani Barodar sobiq hukumat amaldorlarini “korrupsiyaga botganlikda” ayblab, ularning hatto bir nechtasini yangi tarkibga kiritish “Afg‘oniston islom amirligi yaxlitligiga” putur yetkazishini ta’kidlagan.
“Bu insonlar biz bilan hukumatda bo‘la olmaydi, chunki ular besh kishi bo‘lsa ham hukumatimiz obro‘siga putur yetkazadi va biz bunday insonlar hukumatimizni ag‘darishini istamaymiz”, — deydi u.
Uning qayd etishicha, agar jahon hamjamiyati “Tolibon”ni rasmiy darajada tan olmaslikni davom etsa, Afg‘oniston iqtisodiy inqirozga yuz tutadi va bu nafaqat ushbu mamlakatga, balki qo‘shni davlatlar hamda butun dunyoga salbiy ta’sirini ko‘rsatmay qolmaydi.
Eslatib o‘tamiz, 2021-yil avgust oyida hokimiyatni egallagan “Tolibon” harakatining yuqori lavozimli a’zosi Vahidulla Hoshimiy Afg‘oniston demokratik davlatga aylanmasligi, unda shariat qonunlari amal qilishini aytgandi. Uning so‘zlariga ko‘ra, Afg‘onistonda hokimiyat tuzilmasi “Tolibon” hukmronligining avvalgi davri: 1996—2001-yillardagi davlat tuzilishiga o‘xshash bo‘ladi.
Sentabr o‘rtalarida “Tolibon” Ayollar masalalari bo‘yicha vazirlikni tugatib, uning o‘rniga Saxovatni targ‘ib qilish va illatlarni yo‘qotish vazirligini tuzgani, dekabr oyida Afg‘oniston milliy armiyasini shakllantirishga kirishgani haqida xabar berilgandi.
Izoh (0)