Namanganga O‘zbekistonning Eron, Pokiston, Misr, Saudiya Arabistoni, Kuvayt va Yaponiyadagi favqulodda va muxtor elchilari keldi. Bu haqda “Daryo” muxbiri Azizbek Abduvaliyev xabar bermoqda.
Elchilar viloyat hokimligida investitsiya va tashqi savdoga mas’ul mahalliy mutasaddilar bilan uchrashdi. Muloqot davomida elchilar faoliyat olib borayotgan davlatlar ishtirokida Namanganda hozirgacha amalga oshirilgan loyihalar sarhisob qilinib, ularning bajarilishini jadallashtirish uchun zarur tadbirlar kelishib olindi.
Elchilar viloyatning shahar va tumanlarida amalga oshirilayotgan amaliy ishlar natijalari bilan tanishishi ko‘zda tutilgan. Ularga viloyat hokimining o‘rinbosari — investitsiya va tashqi savdo boshqarmasi boshlig‘i Okibjon Inamov hamrohlik qilmoqda.
Ma’lumot uchun, Namanganda 2021-yil davomida 52 ta davlatga 67 turdagi sanoat va meva-sabzavot mahsulotlari eksport qilindi. Eksportning umumiy hajmi 464 million dollarga teng bo‘ldi.
2022-yili viloyatda eksport imkoniyatlarini kengaytirish, mahalliy mahsulotlarni targ‘ib qilish va doimiy taqdimotini o‘tkazib borish uchun “Namangan Ekspomarkaz” tashkil etilishi rejalashtirilmoqda.
Izoh (0)