2022-yilda prezident Shavkat Mirziyoyev Yevropaning qator davlatlariga tashrif buyurishi mumkin. Bu haqda “Yangi O‘zbekistonning 2022–2026-yillarga mo‘ljallangan taraqqiyot strategiyasi to‘g‘risida”gi prezidenti farmoni loyihasida belgilangan.
Oliy darajadagi tashriflar orqali Yevropa mamlakatlari bilan hamkorlik aloqalarini yanada kengaytirish ko‘zda tutilgan.
Davlat rahbarining tashrifi amalga oshirilishi mumkin bo‘lgan davlatlar qatorida Belgiya, Buyuk Britaniya, Vengriya, Italiya, Ispaniya, Turkiya, Shveysariya, Chexiya, Polsha va Skandinaviya mamlakatlari bor.
Shuningdek, Yevropa davlatlari va hukumatlarining rahbarlari hamda Yevropa Ittifoqi rahbariyatining O‘zbekistonga tashriflari ham ishlab chiqiladi.
Bundan tashqari, hujjat loyihasida O‘zbekistonning xorijdagi diplomatik vakolatxonalari moddiy-texnik bazasini oshirish, mamlakatning chet eldagi yangi diplomatik vakolatxonalarini ochish belgilangan. Xususan:
- O‘zbekistonning Shvetsiyada elchixonasini ochish jarayoni tezlashtiriladi;
- O‘zbekistonning Chexiyada diplomatik vakolatxonasini ochish masalasi ishlab chiqiladi;
- O‘zbekistonning Yevropa mamlakatlaridagi (Avstriya, Italiya, Polsha va Latviya) bir qator diplomatik vakolatxonalarining moddiy-texnik bazasini, shuningdek, xodimlar salohiyati qo‘shimcha shtat birliklari ajratish orqali mustahkamlanadi.
Izoh (0)