Shavkat Abdurazzaqov: Namangan o‘zining Ekspomarkaziga ega bo‘ladi

Namanganda eksport imkoniyatlarini kengaytirish, mahalliy mahsulotlarni targ‘ib qilish va doimiy taqdimotini tashkil etish uchun “Namangan Ekspomarkaz” tashkil etiladi. Bu haqda viloyat hokimi Shavkat Abdurazzaqov xalq deputatlari viloyat kengashi sessiyasidagi murojaatida ma’lum qildi, deya xabar beradi “Daryo” muxbiri Azizbek Abduvaliyev.

Abdurazzaqovga ko‘ra, 2021-yili viloyatda tashqi iqtisodiy faoliyat va investitsiyalarni o‘zlashtirish yuqori sur’atlarda amalga oshirilgan. Xitoy, Turkiya, Niderlandiya, Hindiston, Belgiya, Germaniya va Rossiya kabi o‘nlab davlatlardan jami 303,6 million dollar to‘g‘ridan to‘g‘ri xorijiy investitsiya va kredit mablag‘lari jalb etildi.

Jumladan, Chust tumanidagi “Namangan sement” korxonasi tomonidan 16 million dollar, Namangan shahridagi Namangan Qianxing Investment MChJ tomonidan 12,8 million dollar o‘zlashtirilgan.

Viloyatda yana bir muhim yo‘nalish — eksport ham e’tibordan chetda qolgani yo‘q. Joriy yil davomida 464 million dollar qiymatiga teng mahalliy mahsulotlar eksport qilindi. Xususan, 293 million dollarlik sanoat va 71 million dollarlik meva-sabzavot mahsulotlari tashqi bozorga chiqarildi.

“Namangandagi 465 ta eksportyor korxona tomonidan 52 ta davlatga 67 turdagi sanoat va meva-sabzavot mahsulotlari eksport qilindi. 5 ta biz uchun yangi — Peru, Venesuela, Tunis, Bosniya va Gersegovina hamda Janubiy Afrika davlatlari bozorlariga kirib borildi. Keramik kafel plita, sun’iy tola, armatura, qurilish qoplamalari va bo‘yoqlari kabi 11 ta yangi turdagi mahsulotlar eksporti amalga oshirildi”, — deya qayd etib o‘tdi viloyat hokimi.

Viloyat hokimining ta’kidlashicha, Namanganda 2022-yili jami 350 million dollar miqdoridagi xorijiy investitsiya va kredit mablag‘larini jalb etish rejalashtirilmoqda.