Samarqand viloyati Bulung‘ur tumanining sobiq hokimi Bahodir Bahromov viloyat IIB Transportda xavfsizlikni ta’minlash boshqarmasi boshlig‘i lavozimiga tayinlandi. Bu haqda viloyat IIB axborot xizmatiga xabar berdi.
Eslatib o‘tamiz, 2021-yilning 22-dekabr kuni Bulung‘ur tumanida xalq deputatlari tuman kengashining navbatdan tashqari sessiyasida Bulung‘ur tumani hokimi vazifasida faoliyat olib borgan Bahodir Bahromov boshqa ishga o‘tishi munosabati bilan o‘z arizasiga asosan egallab turgan vazifasidan ozod etilgandi. Uning o‘rniga Samarqand viloyati prokurori o‘rinbosari Bulung‘ur tumani hokimi etib tayinlangan edi.
Ta’kidlanishicha, 5-yanvar kuni Samarqand viloyati IIB Transportda xavfsizlikni ta’minlash boshqarmasida IIV TXTBB boshlig‘i polkovnik R.Toshpo‘latov, shuningdek, viloyat IIB boshlig‘ining o‘rinbosarlari polkovnik F.Rahmatov hamda podpolkovnik E.Alkarov ishtirokida shaxsiy tarkib o‘rtasida xizmat intizomi hamda qonunchilikka rioya qilish masalalariga bag‘ishlangan uchrashuv o‘tkazgan.
Uchrashuv avvalida Samarqand viloyati IIB Transportda xafvsizlikni ta’minlash boshqarmasi boshlig‘i lavozimiga tayinlangan podpolkovnik Bahodir Bahromov shaxsiy tarkibga tanishtirilgan. Bahromov Bulung‘ur hokimi etib tayinlanishidan oldin Samarqand shahar IIB boshlig‘i vazifasida faoliyat yuritgan.
Shundan so‘ng xodimlar tomonidan xizmatda yo‘l qo‘yilayotgan kamchiliklar tanqidiy muhokama qilingan.
Avvalroq Rustam Qobilov Samarqand viloyati hokimining turizm, sport, madaniyat, madaniy meros va ommaviy kommunikatsiyalar masalalari bo‘yicha o‘rinbosari — viloyat turizm va sport bosh boshqarmasi boshlig‘i lavozimiga tayinlangani to‘g‘risida xabar berilgandi.
Izoh (0)