Наманганга Ўзбекистоннинг Эрон, Покистон, Миср, Саудия Арабистони, Кувайт ва Япониядаги фавқулодда ва мухтор элчилари келди. Бу ҳақда «Дарё» мухбири Азизбек Абдувалиев хабар бермоқда.
Элчилар вилоят ҳокимлигида инвестиция ва ташқи савдога масъул маҳаллий мутасаддилар билан учрашди. Мулоқот давомида элчилар фаолият олиб бораётган давлатлар иштирокида Наманганда ҳозиргача амалга оширилган лойиҳалар сарҳисоб қилиниб, уларнинг бажарилишини жадаллаштириш учун зарур тадбирлар келишиб олинди.
Элчилар вилоятнинг шаҳар ва туманларида амалга оширилаётган амалий ишлар натижалари билан танишиши кўзда тутилган. Уларга вилоят ҳокимининг ўринбосари — инвестиция ва ташқи савдо бошқармаси бошлиғи Окибжон Инамов ҳамроҳлик қилмоқда.
Маълумот учун, Наманганда 2021 йил давомида 52 та давлатга 67 турдаги саноат ва мева-сабзавот маҳсулотлари экспорт қилинди. Экспортнинг умумий ҳажми 464 миллион долларга тенг бўлди.
2022 йили вилоятда экспорт имкониятларини кенгайтириш, маҳаллий маҳсулотларни тарғиб қилиш ва доимий тақдимотини ўтказиб бориш учун «Наманган Экспомарказ» ташкил этилиши режалаштирилмоқда.
Изоҳ (0)