Turkiyada koronavirusga qarshi vaksinaning to‘rtta dozasini olgan kishilarni beshinchi doza bilan emlashga ruxsat berildi. Bu haqda Daily Sabah gazetasi xabar berdi.
“Sinovac Xitoy vaksinasining ikki dozasi va BioNTech vaksinasining ikki dozasini kamida uch oy oldin olgan shaxslar beshinchi dozani qabul qilish uchun ro‘yxatdan o‘tishi mumkin”, — deb yozadi gazeta. Sinovac, BioNTech va Turkiyada ishlab chiqariladigan Turkovac vaksinalaridan birini beshinchi doza sifatida olish mumkin.
Turkiyada 4-yanvar ertalab holatiga ko‘ra, 18 yoshdan oshgan aholining 83,26 foizi ikki dozali vaksina olgan. O‘tgan sutka davomida mamlakatda 44,9 mingga yaqin kishida koronavirus aniqlangan, 160 nafar bemor kasallikdan vafot etgan, 27,5 ming nafarga yaqin kishi tuzalib ketgan.
Dekabr oxiridan buyon Turkiyada koronavirus bilan kasallanganlar soni rekord darajada oshmoqda. Mamlakatda kasallanish holatlarining ortishi yangi “omikron” shtammi tarqalishi bilan bog‘liq.
Avvalroq Isroil hukumati “omikron” shtammiga qarshi kurashish uchun 60 yoshdan oshgan fuqarolarning barchasiga vaksinaning to‘rtinchi dozasini olishni tavsiya qilgandi.
Mavzuga doir:
Izoh (0)