Qozog‘iston prezidenti Qosim-Jo‘mart To‘qayevning aytishicha, gaz narxini pasaytirish talabi bilan norozilik namoyishiga chiqqan Mang‘istov viloyati aholisi muloqotga tayyorligini namoyish qilishi kerak. Muammo yuzasidan tuzilgan hukumat komissiyasiga esa respublika barqarorligi manfaatlaridan kelib chiqqan holda “o‘zaro maqbul yechim” topish topshirildi.
Dam olish kunlari Mang‘istov viloyatining Janao‘zen va Aqtau shaharlari aholisi suyultirilgan gaz narxini pasaytirish talabi bilan norozilik namoyishiga chiqqandi. Ijtimoiy tarmoqlardagi xabarlarga ko‘ra, aholi gaz narxini 120 tengedan (0,27 dollar) 60 tengega (0,13 dollar) tushirishni talab qilgan.
“Aqtauda hukumat komissiyasi ish boshladi, uning tarkibiga prezident ma’muriyati xodimlari kiradi. Respublika operativ shtabi doimiy asosda ishlamoqda. Komissiyaga mamlakatimizdagi barqarorlik manfaatlaridan kelib chiqqan holda yuzaga kelgan muammoning o‘zaro maqbul yechimini topish topshirildi. Huquq-tartibot organlariga jamoat tartibining buzilmasligini ta’minlash bo‘yicha ko‘rsatmalar berildi. Namoyishchilar mas’uliyat va muloqotga tayyor bo‘lishi lozim”, — deb yozgan Qozog‘iston prezidenti Twitter’da.
Avvalroq To‘qayev topshirig‘iga ko‘ra Mang‘istov viloyatidagi vaziyatni ko‘rib chiqish uchun hukumat komissiyasi tuzilgan edi. Shuningdek, viloyatdagi norozilik namoyishlari fonida Olmaota shahridagi markaziy Respublika maydoni yopib qo‘yilgani xabar qilingandi.
Izoh (0)