Туркияда коронавирусга қарши вакцинанинг тўртта дозасини олган кишиларни бешинчи доза билан эмлашга рухсат берилди. Бу ҳақда Daily Sabah газетаси хабар берди.
«Sinovac Хитой вакцинасининг икки дозаси ва BioNTech вакцинасининг икки дозасини камида уч ой олдин олган шахслар бешинчи дозани қабул қилиш учун рўйхатдан ўтиши мумкин», — деб ёзади газета. Sinovac, BioNTech ва Туркияда ишлаб чиқариладиган Turkovac вакциналаридан бирини бешинчи доза сифатида олиш мумкин.
Туркияда 4 январь эрталаб ҳолатига кўра, 18 ёшдан ошган аҳолининг 83,26 фоизи икки дозали вакцина олган. Ўтган сутка давомида мамлакатда 44,9 мингга яқин кишида коронавирус аниқланган, 160 нафар бемор касалликдан вафот этган, 27,5 минг нафарга яқин киши тузалиб кетган.
Декабрь охиридан буён Туркияда коронавирус билан касалланганлар сони рекорд даражада ошмоқда. Мамлакатда касалланиш ҳолатларининг ортиши янги «омикрон» штамми тарқалиши билан боғлиқ.
Аввалроқ Исроил ҳукумати «омикрон» штаммига қарши курашиш учун 60 ёшдан ошган фуқароларнинг барчасига вакцинанинг тўртинчи дозасини олишни тавсия қилганди.
Изоҳ (0)