1-yanvar kuni kechasi noma’lum shaxs Janubiy Koreyani tark etib, KXDR chegarasini bosib o‘tdi, deb xabar beradi Associated Press agentligi.
Janubiy Koreya Birlashgan shtab boshliqlari qo‘mitasi harbiylarining ma’lum qilishicha, erkakni Koreya yarimorolini ajratib turuvchi demilitarizatsiya zonasida payqab qolishgan. Dastavval harbiylar kimni payqagani noma’lum bo‘lgan: janubiy koreyalik qochoqmi yoki qo‘shni mamlakat hududiga o‘tib, yana ortga qaytgan Shimoliy Koreya fuqarosi. Sueldagi harbiy rahbariyat Shimoliy Koreya hukumatidan qochoqning xavfsizligini ta’minlashni so‘ragan. Biroq hozircha hech qanday javob kelmagan.
Keyinroq chegarani noqonuniy kesib o‘tgan shaxs KXDRdan kelgan qochoq ekani ma’lum bo‘lgan. 3-yanvar kuni Janubiy Koreyaning Yonhap agentligi mamlakat Mudofaa vazirligiga tayanib, kuzatuv kameralari yordamida qonunbuzarning shaxsini aniqlashga muvaffaq bo‘linganini yozdi. 2020-yilning noyabrida u Shimoliy Koreyadan qochib o‘tgan. Mudofaa vazirligining ta’kidlashicha, erkakni josus deb hisoblashga hech qanday asos yo‘q.
Shimoliy Koreyada qochoqni koronavirusga qarshi qattiq choralar sabab o‘lim jazosi kutayotgan bo‘lishi mumkin
Mamlakat pandemiya boshida turistlar uchun chegaralarini yopgan. KXDRdagi rasmiy OAVlar ma’lumotlariga ko‘ra, 2021-yilning dekabr holati bo‘yicha Shimoliy Koreyada koronavirus bilan kasallanish bo‘yicha birorta ham holat qayd etilmagan. Ushbu ma’lumotlar ekspertlarda shubha uyg‘otmoqda, ammo uni tasdiqlash yoki rad etishning imkoni yo‘q. 2020-yilning sentabrida KXDR chegarachilari ikki mamlakatning dengiz chegarasida bo‘lgan janubiy koreyalik amaldorni otib tashlab, uning jasadini yoqib yuborgandi. Kim Chen In Seuldan rasman kechirim so‘ragan. Janubiy Koreya harbiylarining ma’lumotlariga ko‘ra, Pxenyan mamlakatga koronavirus kirib kelmasligi uchun o‘t ochish siyosatini joriy etgan.
Demilitarizatsiya zonasi orqali Janubiy Koreyadan Shimoliyga o‘tish — kamdan kam uchraydigan holat
Mamlakat chegarasidagi zonaning kengligi — 4 kilometrni, uzunligi esa 248 kilometrni tashkil etadi. Ushbu hududga 2 millionga yaqin mina o‘rnatilgan, atrofi tikanli panjaralar bilan o‘ralgan va ikki mamlakatning qurollangan qo‘shinlari qo‘riqlaydi. 1953-yilda yakunlangan Koreya urushidan buyon KXDRni 34 mingdan ortiq odam tark etgan, ammo ularning aksariyati Janubiy Koreyaga Xitoy yoki Janubi-Sharqiy Osiyoning boshqa mamlakatlari orqali kelgan.
Izoh (0)