2022-yilning birinchi ish kunida Turkmaniston prezidenti Gurbanguli Berdimuhamedov Mari viloyatiga tashrif buyurdi. Bu haqda TDH davlat agentligi xabar berdi.
Ma’lum qilinishicha, Berdimuhamedov vertolyotda “Galkynyş” gaz koniga tashrif buyurgan. Bu yerda uni “Turkmengaz” davlat konserni Tabiiy gaz ilmiy tadqiqot instituti direktori, “Turkmengeologiya” davlat korporatsiyasi raisi, “Turkmengaz” davlat konserni raisi hamda mamlakatdagi yonilg‘i-energetika kompleksiga mas’ul Vazirlar Mahkamasi raisi o‘rinbosari Sh. Abdurahmonov kutib olgan.
Berdimuhamedovga mazkur hududda aniqlangan istiqbolli konlar, ularni o‘zlashtirish usullari haqida batafsil ma’lumot aks ettirilgan chizma va sxemalar taqdim etilgan. Reportajda ta’kidlanishicha, uglevodorodga boy resurslardan samarali foydalanish, shuningdek, mazkur sohadagi keng ko‘lamli loyihalarni atrof-muhitga zarar yetkazmasdan amalga oshirishga oid masalani hal etishda eng ilg‘or texnologiyalardan foydalanilgan.
Shu bilan birga, Bloomberg agentligining ma’lum qilishicha, Turkmanistonda atmosferaga chiqarilayotgan metall butun dunyo uchun jiddiy xavfni yuzaga keltirmoqda va issiqxona gazini chiqarish bo‘yicha Turkmaniston faqatgina AQSh va Rossiyadan keyin turadi.
Shundan so‘ng, Gurbanguli Berdimuhamedov Mari viloyatidagi yaylovlar holati bilan tanishgan va Dovlran Yazliyev cho‘pon lageriga tashrif buyurgan. Cho‘pon “g‘urur bilan xalq yetakchisi bu yerlarga mo‘l-ko‘llik olib kelganini — oxirgi kuchli yomg‘ir dala o‘simliklarining o‘sishiga foydali ta’sir ko‘rsatishini, bu ayniqsa, mayda kavsh qaytaruvchi hayvonlarning xavfsiz qishlashi uchun muhim ekanligini ta’kidlagan”.
Avvalroq Ashxobodda Gurbanguli Berdimuhamedovning she’riga bag‘ishlangan maxsus konferensiya o‘tkazilgani, Gurbanguli Berdimuhamedov Turkmanistonda neft-gaz kompleksi nazoratini o‘g‘liga topshirgani to‘g‘risida xabar berilgandi.
Izoh (0)