Afg‘oniston va Turkmaniston chegarasida “Tolibon” harakati jangarilari va turkmanistonlik chegarachilar o‘rtasida qurolli to‘qnashuvlar bo‘lib o‘tdi. Bu haqda Afg‘onistonning Hasht-e subh gazetasiga tayanib, “TASS” xabar berdi.
“Uch kun oldin Turkmaniston chegara xizmati xodimlari bir fuqaroni o‘ldirib, ikkinchisini kaltaklagan. Hodisa yuzasidan olib borilayotgan tergov chog‘ida ularning harakatlariga javoban ‘Tolibon’ jangarilari o‘q uzgan”, — dedi Afg‘oniston shimolidagi Juzjon viloyatining “Tolibon” tomonidan tayinlangan axborot va madaniyat bo‘limi boshlig‘i Hilol Balxiy.
Qayd etilishicha, Turkmaniston chegarachilari va “Tolibon” o‘rtasida 3-yanvar kuni ertalab Juzjon viloyatining Hamab tumanida otishma sodir bo‘lgan. Hodisaning boshqa tafsilotlari haqida xabar berilmagan.
2021-yil 1-dekabr kuni Eron va Afg‘oniston chegarasida Eron armiyasi va “Tolibon” harakati o‘rtasida jangovar to‘qnashuvlar sodir bo‘lgandi. Bunga toliblar chegara aniq qayerdan o‘tganini bilmagani sabab bo‘lgan.
Shuningdek, dekabr oyida Afg‘oniston-Pokiston chegaralarida ham “Tolibon” jangarilari ishtirokida shunga o‘xshash voqealar sodir bo‘lgan.
Izoh (0)