2022-yilda farzandli bo‘lishi kutilayotgan o‘zbek shou-biznesi vakillari (foto)
Yakunlanayotgan yilda shou-biznes vakillarining ko‘pchiligi ota-ona bo‘lish baxtiga musharraf bo‘lishdi. 2022-yilda ona bo‘lishni rejalashtirayotgan san’at vakillari ham bisyor. Ularning ayrimlari bilan tanishtiramiz.
Asal Shodiyeva
2020-yilning sentabr oyida ilk bor ona bo‘lgan aktrisa Asal Shodiyeva yana homilador. Oilaning to‘ng‘ich farzandi Muhammadyusuf 2 yoshga to‘lgan. Aktrisa ayni damda turmush o‘rtog‘i Shohruhxon bilan Turkiyaga safar qilgan. Mish-mishlarga qaraganda, Asal Shodiyeva ikkinchi farzandini Istanbul shahridagi xususiy tug‘ruqxonada dunyoga keltirmoqchi.
Bahora Arslonova
Aktrisa ayni damda besh oylik homilador. U 2021-yilning yanvar oyida qizi Volidaxonni dunyoga keltirgandi. Rejalashtirilmagan homiladorlik aktrisa va uning oila a’zolarini quvontirgan. Aktrisaning aytishicha, ikkinchi farzandi aprel oyida dunyoga keladi.— Navbatdagi homilamni o‘g‘il deyishyapti. Ikkinchi homiladorligim u qadar qiyin kechmadi. Yoshiga to‘lmagan farzandim bilan qiynalaman, deb o‘ylagandim. Ko‘z tegmasin, hammasi oson kechyapti, — deydi aktrisa Bahora Arslonova.
Dilso‘z
Xonanda Dilso‘z to‘rtinchi farzandini dunyoga keltirishga tayyorgarlik ko‘rmoqda. U ilk farzandi Dilso‘zni (xonanda qiziga taxallusini ism sifatida qo‘ygan) 2015-yilning oktabr oyida dunyoga keltirgan. Undan keyin 2017-yilda yana qizlik, 2019-yilda esa o‘g‘il farzandli bo‘lgan.— Bolaligimdan serfarzand onalarga havas qilganman. Nasib qilsa, Yangi yilda to‘rtinchi bor onalik baxtiga erishaman. O‘ylaymanki, yaratgan o‘g‘limni ukacha bilan siylaydi, — deydi xonanda Dilso‘z.
Huvaydo Jumayeva
O‘zbekiston davlat Satira teatri aktrisasi Huvaydo Jumayeva to‘rtinchi farzandiga homilador. U ilk farzandi Mavlonbekni 2010-yilda, qizi Mohizarni 2015-yilda, Muhammadaminni esa 2020-yilda dunyoga keltirgandi.— Qizimni ikkita qilay, deb niyat qildim. U ukasi Muhammadamin tug‘ilganda singil olib kelmaganim uchun biroz ranjigandi. Nasib qilsa, bahorda farzandlarim soni yana bittaga ko‘payadi. Tug‘ruqdan keyin biroz dam olib, yana ijodga qaytaman, — deydi aktrisa.
Dilnoza Ismiyaminova
Eshitishimizcha, xonanda Dilnoza Ismiyaminova ham homilador, ammo u negadir buni inkor etdi. Uning hozircha Umidjon ismli o‘g‘li bor.
— Homilador bo‘lishni chin ko‘ngildan istayman. Qaniydi, o‘g‘limning shirin ukasi yoki singlisi bo‘lsa. 2022-yilda yana bir karra ona bo‘lish niyatidaman. Kelayotgan yildan umidlarim katta, — deydi xonanda Dilnoza Ismiyaminova.
