O‘zbekistonda “Sog‘lom turmush tarzi” platformasida har kuni 10 ming qadam yurganlik uchun shu kunga qadar fuqarolarga 43 milliard 45 million 953 ming so‘m to‘lab berilgan. Bu haqda Turizm va sport vazirligi xabar qildi.
Ma’lum qilinishicha, “1hls.uz” platformasida ro‘yxatdan o‘tgan 18 yoshdan yuqori fuqarolar soni 1 million 209 ming 77 nafarni tashkil etgan. Foydalanuvchilarning 757 ming 680 nafari erkaklar, 451 ming 397 nafari ayollar hisoblanadi.
Eslatib o‘tamiz, 2020-yilning oktabrida “Sog‘lom turmush tarzini hayotga keng tatbiq etish va ommaviy sportni yanada rivojlantirish chora-tadbirlari to‘g‘risida” prezident farmoni qabul qilingan. Unga muvofiq, 10-iyundan boshlab O‘zbekistonda 10 ming qadam yurgan fuqarolarga 3 ming so‘mdan pul to‘laydigan platforma test rejimida ishga tushirilgan.
Sentabr oyida “1hls.uz” mobil ilovasi foydalanuvchilariga pul to‘lashni vaqtincha to‘xtatgani haqida xabarlar tarqaldi. Turizm va sport vazirligi 1hls.uz mobil ilovasi foydalanuvchilarga pul to‘lashni vaqtincha to‘xtatgani haqidagi xabarlar yuzasidan munosabat bildirib, ma’lumotlar asossiz ekanini ma’lum qildi.
Izoh (0)