O‘zbekistonda 1hls.uz mobil ilovasi foydalanuvchilariga pul to‘lashni vaqtincha to‘xtatdi

“Sog‘lom turmush tarzi” platformasiga oid 1hls.uz mobil ilovasi foydalanuvchilariga pul to‘lashni vaqtincha to‘xtatdi, deya xabar qilmoqda Turizm va sport vazirligi.

Vazirlar Mahkamasining 2021-yil 28-apreldagi “Sog‘lom turmush tarzi” platformasi faoliyatini tashkil etish chora-tadbirlari to‘g‘risida”gi 253-sonli qaroriga muvofiq, aholini kunlik yurish va yugurishga targ‘ib qilish bo‘yicha “Sog‘lom turmush tarzi” platformasi, ya’ni www.1hls.uz veb-sahifasi hamda mobil ilovasi ishga tushirilgandi.

Mazkur platforma bo‘yicha 2021-yil 10-iyundan 13-sentabrga qadar bir sutka davomida o‘n ming va undan ortiq qadam yurgan 18 va undan yuqori yoshdagi O‘zbekiston fuqarolarining platformadagi elektron hamyoniga jami 9,4 milliard so‘m mablag‘lar to‘lab berildi.

Shuningdek, har oyda har bir tuman (shahar) bo‘yicha eng ko‘p yurgan shaxsga 300 ming so‘mdan, har bir hudud bo‘yicha eng ko‘p yurgan shaxsga 500 ming so‘m, respublika bo‘yicha eng ko‘p yurgan shaxsga qo‘shimcha ravishda 1 million so‘m to‘lanib, 2021-yil iyun–avgust oylari davomida jami 206,7 million so‘m mablag‘ foydalanuvchilar elektron hamyoniga o‘tkazib berildi.

Turizm va sport vazirligining Moliya vazirligi g‘aznachiligida ochilgan shaxsiy g‘azna hisob varag‘iga tushadigan tegishli daromadlar manbalarining bir me’yorda doimiy tushish imkoniyati cheklangani inobatga olib, mazkur shaxsiy g‘azna hisob varag‘ida 500 million so‘mdan kam mablag‘ qolsa, mobil ilova bo‘yicha foydalanuvchilarga to‘lovlar, ushbu shaxsiy g‘azna hisob varag‘ida 5 milliard so‘mgacha mablag‘ yig‘ilgunga qadar avtomatik tarzda to‘xtatilishi belgilab qo‘yilgan.

Bunda, shaxsiy g‘azna hisob varag‘idagi mablag‘lar 5 milliard so‘mga yetgunga qadar mobil ilovada o‘n ming va undan ortiq qadam yurgan fuqarolarga to‘lanadigan to‘lovlar to‘lanmasligi ko‘rsatib o‘tilgan.

Yuqoridagilardan kelib chiqqan holda, 2021-yil 14-sentabrdan boshlab mobil ilova bo‘yicha foydalanuvchilarga to‘lovlar vaqtincha to‘xtatildi.

Bundan avval O‘zbekiston aholisi iyul oyida piyoda yurish orqali qariyb 69 mln so‘m ishlab topgani hamda O‘zbekistonda iyun oyida eng ko‘p piyoda yurgan deb topilgan fuqaro 1,8 mln so‘m bilan mukofotlangani haqida xabar berilgandi.