Ўзбекистонда «Соғлом турмуш тарзи» платформасида ҳар куни 10 минг қадам юрганлик учун шу кунга қадар фуқароларга 43 миллиард 45 миллион 953 минг сўм тўлаб берилган. Бу ҳақда Туризм ва спорт вазирлиги хабар қилди.
Маълум қилинишича, «1hls.uz» платформасида рўйхатдан ўтган 18 ёшдан юқори фуқаролар сони 1 миллион 209 минг 77 нафарни ташкил этган. Фойдаланувчиларнинг 757 минг 680 нафари эркаклар, 451 минг 397 нафари аёллар ҳисобланади.
Эслатиб ўтамиз, 2020 йилнинг октябрида «Соғлом турмуш тарзини ҳаётга кенг татбиқ этиш ва оммавий спортни янада ривожлантириш чора-тадбирлари тўғрисида» президент фармони қабул қилинган. Унга мувофиқ, 10 июндан бошлаб Ўзбекистонда 10 минг қадам юрган фуқароларга 3 минг сўмдан пул тўлайдиган платформа тест режимида ишга туширилган.
Сентябрь ойида «1hls.uz» мобил иловаси фойдаланувчиларига пул тўлашни вақтинча тўхтатгани ҳақида хабарлар тарқалди. Туризм ва спорт вазирлиги 1hls.uz мобил иловаси фойдаланувчиларга пул тўлашни вақтинча тўхтатгани ҳақидаги хабарлар юзасидан муносабат билдириб, маълумотлар асоссиз эканини маълум қилди.
Изоҳ (0)