Qashqadaryo viloyati Nishon tumani prokurori sud qarorini tan olmasligini aytib, sobiq kelinining ikki nafar farzandini tortib olgan. Bu haqda “Daryo”ga murojaat qilgan kelin Dilnoza Rahmonova ma’lum qildi. Kelin bo‘lib tushgan xonadonidan 2020-yil sentabrida haydalganini aytayotgan Dilnoza Nishon tumani prokurori sifatida ishlab kelayotgan qaynotasi ikki nafar farzandini 2021-yilning 25-dekabr kuni olib ketib, qaytib olib kelmaganini aytmoqda.
Dilnoza Rahmonova turmush o‘rtog‘i — Nishon tuman prokurorining o‘g‘li Ya.S. bilan 2015-yil turmush qurib, 2020-yilga qadar birga yashagan. Turmushidan qonuniy ajrashmasa-da, Dilnoza ayni kunda yolg‘iz yashab kelmoqda.
“Turmushimdan ikki nafar o‘g‘il farzandimiz bor. Yasholmay ajrashganimizning sababi shuki, turmush o‘rtog‘im menga juda qo‘pol munosabatda bo‘lardi. Meni odam o‘rnida ko‘rmasdi. Har kuni do‘pposlardi. Ustiga-ustak qaynonam va qaynsinglim ham urardi. O‘sha xonadonda meni itchalik qadrim bo‘lmagan. Men barchasiga chidadim, oilamni saqlab qolishga urindim. Ammo imkoni bo‘lmadi. 2020-yil 8-sentabr kuni o‘sha xonadondan quvildim — meni itdek ko‘chaga chiqarib, haydashdi”, — dedi turmushi buzilgani haqida gapirgan ayol. Dilnoza Rahmonovaning ta’kidlashicha, u yashash xonadonidan yolg‘iz o‘zi, farzandlarisiz quvilgan.
“Bolalarimni olib qolishdi. Men esa ikki oy xuddi telbalardek yashadim. Keyin onalik huquqimni talab qilib, Bosh prokuraturaga murojaat qildim, sudga berdim. Ikki oydan so‘ng dastlab kichik o‘g‘limni, keyin kattasini qaytarib oldim. Sud qaroriga ko‘ra, sobiq erimga bolalarimni ko‘rish uchun oyning birinchi va oxirgi shanbasida soat 09:00 dan 17:00 ga qadar Qarshi shahridagi uyiga olib ketib, uchrashish huquqi berildi. Ammo prokuror qaynotam va tergovchi erim qonun talabini buzib, sud qaroriga zid ravishda bolalarimni yana olib qo‘ydi. Qaynotam sud qarorini tan olmasligini, bolalarimni qaytarib bermasligini aytmoqda”, — deydi Dilnoza Rahmonova.
Ayolning qo‘shimcha qilishicha, u mazkur masala yuzasidan viloyat prokuraturasiga qatnayverib charchagan. “Muammoni aytib, ulardan yordam so‘rasak, kimdir qaynotamni ustozi sifatida hurmat qilishini aytsa, yana kimdir undan qo‘rqishini bildirdi. Xullas, murojaatimiz yechim topmayapti. Qarg‘a qarg‘aning ko‘zini cho‘qimaydi deganlaridek, viloyat prokuraturasi prokuror qaynotamning noqonuniy xatti-harakatini jim turib kuzatmoqda”, — dedi Dilnoza Rahmonova.
MIB va prokuratura organlari munosabati
MIB Qashqadaryo viloyat boshqarmasidan “Daryo”ga ma’lum qilishlaricha, mazkur ish bo‘yicha ikkita ijro hujjati mavjud edi, hozirda har ikkala ijro hujjati — qaynota va erdan bolalarni onasiga olib berish va erning bolalari bilan ko‘rishish huquqini ta’minlash bajarilgani bois, “Sud hujjatlari va boshqa organlar hujjatlarini ijro etish to‘g‘risida”gi qonunning 41-moddasiga asosan ijro ishini yuritishni tamomlash to‘g‘risida qaror qabul qilingan.“Murojaatchi Dilnoza Rahmonovaga hozirda Majburiy ijro byurosi Qarshi tuman bo‘limi ish yurituvida bolani unga olib berish bo‘yicha ijro hujjati mavjud emasligi va kelgusida bu masala yuzasidan sudga murojaat qilishi lozimligi tushuntirilgan”, — deyiladi MIBning viloyat boshqarmasi axborot xizmati taqdim etgan ma’lumotda.
Bosh prokuratura axborot xizmati Nishon tuman prokurorining xatti-harakatlari yuzasidan xizmat tekshiruvi tayinlanganini ma’lum qildi.
Izoh (0)