29-dekabr kuni 11 yoshli ikki nafar bola Nukus shahri “Janabazar” hududidagi Qosko‘l drenaj ko‘lida muz o‘rtasida qolib ketgan. Bu haqda Qoraqalpog‘iston Respublikasi FVB matbuot xizmati ga tayanib, “Gazeta.uz” xabar berdi.
Mazkur holat yuzasidan shu kuni soat 16:45 larda boshqarmaning 1050 qisqa raqamiga chaqiruv kelib tushgan.
Ma’lum bo‘lishicha, “Janabazar” hududida joylashgan Qosko‘l drenaj ko‘lida 2010-yilda tug‘ilgan ikki nafar bola muzda o‘ynash maqsadida drenaj ko‘liga borgan va muz yorilishi oqibatida suvga tushib ketgan.
Shundan so‘ng, o‘zlari harakat qilib muzning qalin joyiga chiqib olgan. Ular ko‘l o‘rtasidagi orolchada qolib ketgan. Muz yorilgani tufayli bolalarning ortga qaytish imkoni bo‘lmagan va ular yordam kelishini kutgan.
Chaqiruv bo‘yicha voqea joyiga FVBning maxsus otryadi yetib borib, muz ustida qolib ketgan bolalarni qirg‘oqqa olib o‘tib, voqea joyida ularga birinchi tibbiy yordam berilgan va malakaviy yordam ko‘rsatish uchun shifoxonaga yuborilgan.
Hozirda bolalarning ahvoli yaxshi, ular ota-onasi bilan.
Eslatib o‘tamiz, 2021-yilning iyunida Samarqanddagi suv omborida cho‘kib ketayotgan fuqaro qutqarib qolingani to‘g‘risida xabar berilgandi.
Izoh (0)