Sirdaryo viloyati hokimligining 477,9 million so‘mga Kia Sorento Comfort xizmat avtomobili xaridi bo‘yicha shartnomasi bekor qilinib, mablag‘lar “Saxovat va ko‘mak” jamg‘armasiga yo‘naltirildi. Bu haqda viloyat hokimligi matbuot xizmati xabar berdi.
21-dekabrida viloyat hokimligi hamda Toshkent shahridagi Kia avtomobillarini yetkazib beruvchi avtosalon o‘rtasida tuzilgan shartnomaga ko‘ra, hokimlik 477,9 million so‘mga Kia Sorento Comfort avtomobilini xarid qilgan edi.
“Mazkur holat ijtimoiy tarmoqlarda muhokamalarga sabab bo‘lib, tarmoq faollari o‘z qarashlarini bayon etdi. Keng jamoatchilikning fikr-mulohazalarini inobatga olgan holda hokimlik hamda avtomobil yetkazib beruvchi avtosalon o‘rtasida tuzilgan shartnoma bekor qilindi”, — deyiladi xabarda.
Ma’lum qilinishicha, mazkur mablag‘lar mahalliy budjetga tiklangan holda viloyatdagi ehtiyojmand, ijtimoiy yordamga muhtoj, nogironligi bor, boquvchisini yo‘qotgan oilalarni yanada qo‘llab-quvvatlash uchun “Saxovat va ko‘mak” jamg‘armasiga yo‘naltirilgan.
Ushbu holat bo‘yicha Sirdaryo viloyati mahalliy budjeti mablag‘larini ishlatilishini hamda davlat xaridlari to‘g‘risidagi talablarni yetarli nazorat qilmagani uchun Sirdaryo viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Anvar Karimovga “hayfsan” intizomiy jazo chorasi qo‘llanilgan.
Vazirlar Mahkamasining 2021-yil 29-apreldagi 258-son qarori bilan “Davlat boshqaruvi va mahalliy davlat hokimiyati organlarida xizmat avtotransport vositalarini biriktirish me’yorlari” tasdiqlangan. Unga ko‘ra, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining xizmat mashinalari narxlari BHMning 2000 baravaridan (540 million so‘m), dvigatel eng yuqori quvvati 4000 santimetr/kubdan oshmasligi belgilangan.
Avvalroq Toshkent viloyati hokimligi hokim o‘rinbosarlari uchun Malibu va Tracker sotib olgani, Surxondaryo hokimligi qariyb 700 mln so‘mga ikkita Skoda Kodiaq xarid qilgani to‘g‘risida xabar berilgandi.
Izoh (0)