30-dekabr kuni Telegram’dagi “Namanganliklar.uz” kanalida Yo‘l harakati xavfsizligi xodimining niqob taqish majburiyati bekor qilinganini aytgan videosi e’lon qilindi.
Videoda YHX xodimi nima uchun niqob taqmasdan yurgani bo‘yicha berilgan savolga “niqob taqish 1-noyabrdan ‘otmen’ bo‘lgan”, deya javob bergan.
“Gazeta.uz”ning yozishicha, nashr ushbu holat bo‘yicha Ichki ishlar vazirligi matbuot kotibi Shoxrux G‘iyosovdan izoh so‘ragan.
Uning ma’lum qilishicha, tibbiy niqobni taqish majburiyati koronavirusga qarshi kurash bo‘yicha Respublika maxsus komissiyasi tomonidan bekor qilinmagan. “Yo‘l harakati xavfsizligi xodimining harakatlariga tegishli huquqiy baho beriladi”, — degan IIV matbuot kotibi.
Eslatib o‘tamiz, dekabr boshida O‘zbekiston koronavirusning “omikron” shtammi sabab 10 ta davlat bilan aviaqatnovlarni vaqtincha to‘xtatgan edi. Mamlakatga ayrim davlatlardan keluvchilar 10 kunlik majburiy karantinga olinishi belgilangan.
Izoh (0)