Жиззах шаҳрида банк ходими ўз мижозларининг пластик карталаридаги пулларини ўғирлаш билан шуғулланиб келган шахс аниқланди, деб хабар беради Жиззах вилояти ИИБ ахборот хизмати.
Маълум қилинишича, шаҳарнинг «Дўстлик» маҳалла фуқаролар йиғинида истиқомат қилувчи фуқаро ички ишлар органларига мурожаат қилиб, унга тегишли банк пластик картасидан номаълум шахс 8 миллион сўм пулини ечиб олганини билдирган.
Ҳолат бўйича жиноят иши қўзғатилиб, олиб борилган тезкор қидирув тадбирлари натижасида мазкур жиноят жабрланувчи мижоз бўлган банкнинг чакана хизматлар бўлими бошлиғи, Жиззах шаҳрининг «Учариқ» маҳалласида истиқомат қилувчи шахс томонидан содир этилгани аниқланган.
Шунингдек, айбланувчи яна 10 нафар фуқаронинг пулини ўмарган бўлиб, жабрланувчиларга жами 133 миллион 629 минг сўм зарар етказилган. Ҳолат юзасидан тергов ҳаракатлари олиб борилмоқда.
Аввалроқ Бухорода оғир касал эканини айтиб, фуқаро ишончига кирган ва унинг пластик карточкасидан салкам 1 млн сўм ечиб олган қизга жиноят иши очилганди.
Изоҳ (0)