Buxoro viloyati hokimi o‘rinbosari – viloyat mahalla va oilani qo‘llab-quvvatlash boshqarmasi boshlig‘i Yo‘ldosh Jumayev vazifasidan ozod etildi. Bu haqda “Daryo”ga viloyat hokimi matbuot xizmati xabar bermoqda.
Yo‘ldosh Jumayev 2020-yilning fevral oyida Kogon tuman hokimi vazifasidan viloyat hokimi o‘rinbosari lavozimiga tayinlangan edi. 2021-yilning fevral oyida Buxoroga tashrif buyurgan O‘zbekiston prezidenti quruq hisobot bilan cheklangan ushbu mansabdorga kamroq gapirib, ko‘proq ishlashni maslahat bergan edi. “Men siz bilan birinchi marta gaplashyapman. Kamroq gapiring, menga qilgan ishlaringizni... Balandparvoz gaplar menga yoqmaydi”, – degan edi.
Ta’kidlanishicha, Yo‘ldosh Jumayev o‘z arizasiga binoan ishdan bo‘shatilgan. Ushbu o‘ringa vazirlikda boshqarma boshlig‘i lavozimidan ishlab kelgan Ahror G‘ulomov tayinlangan.
Ahror G‘ulomov 1970-yilda G‘ijduvon tumanida tug‘ilgan. Ma’lumoti oliy. Toshkent Davlat universiteti (1996-yil) hamda O‘zbekiston Milliy universitetini (2006-yil) tamomlagan. U o‘z mehnat faoliyatini G‘ijduvon tumanidagi 1-umumiy o‘rta ta’lim maktabida o‘qituvchi sifatida boshlagan. Shundan so‘ng davlat hokimiyati organlarida turli lavozimlarda ishlab kelgan. Ayni paytga qadar Ahror G‘ulomov Mahalla va oilani qo‘llab-quvvatlash vazirligi boshqarma boshlig‘i sifatida faoliyat ko‘rsatib kelgan.
Izoh (0)