Afrikada COVID-19 bilan kasallanish oqibatidagi o‘limlar o‘tgan haftaga nisbatan 72 foizga oshdi. Bu haqda Jahon sog‘liqni saqlash tashkilotining (JSST) koronavirus bo‘yicha haftalik hisobotiga tayanib, “Kommersant” xabar berdi. O‘tgan hafta butun dunyoda koronavirusdan jami 44,6 mingga yaqin o‘lim qayd etilgan.
JSST hisobotiga ko‘ra, dunyo miqyosida COVID-19 infeksiyasidan o‘lim darajasi o‘tgan haftaga nisbatan 4 foizga kamaydi. O‘lim ko‘rsatkichining o‘sishi Janubi-Sharqiy Osiyoda (9 foizga) va Amerika qit’asida (7 foizga) ham qayd etilgan.
Polshada 28-dekabr kuni COVID-19 dan vafot etganlar soni bo‘yicha antirekord qayd etildi. Mamlakatda bir sutkada 794 nafar koronavirusga chalingan bemor vafot etgan. Shuningdek, o‘tgan kun davomida yana 15,5 mingdan ortiq kishida koronavirus aniqlangan.
Polsha hukumatining epidemiologik masalalar bo‘yicha maslahatchisi Anjey Xorban mamlakatda tez orada koronavirus “sunamisi” yuz berishini va kasalxonaga yotqizilganlar soni 1 millionga yetishini aytgan.
28-dekabr kuni Argentinada butun pandemiya davridagi kunlik kasallanishlarning maksimal ko‘rsatkichi qayd etildi — 33,9 kishida koronavirus aniqlandi. Mamlakatda so‘nggi 24 soat ichida 20 kishi infeksiya oqibatida vafot etdi.
Argentinada kasallanish dekabr oyining o‘rtalaridan beri ortib bormoqda. Mamlakat aholisining 78 foizi to‘liq emlangan, bu Lotin Amerikasidagi eng yuqori ko‘rsatkichlardan biri.
27-dekabr kuni butun dunyoda rekord darajada ko‘p odamda — 1,44 milliondan ortiq kishida COVID-19 aniqlangan edi. So‘nggi yetti kunlik kasallanishlarning o‘rtacha darajasi ham rekord bo‘lgan — 841 ming atrofida. Bu bir oy oldin “omikron” shtammi birinchi marta aniqlangan vaqtga nisbatan 49 foizga yuqori.
Bloomberg so‘nggi tadqiqotlarga tayanib ma’lum qilishicha, “omikron” avvalgi shtammlarga qaraganda 70 marta tezroq yuqadi, lekin u keltirib chiqaradigan kasallik, ayniqsa, odam koronavirusga qarshi emlangan yoki buster doza olgan bo‘lsa, yengilroq o‘tadi. Shu bilan birga janubiy afrikalik olimlar Pfizer vaksinasi “omikron” shtammiga qarshi samarasiz ekanini aniqlagandi.
Koronavirusning yangi “omikron” shtammi birinchi marta 11-noyabr kuni Janubiy Afrikada topilgan. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda “omikron” bilan qayta kasallanish ehtimoli yuqoriligini ma’lum qildi.
Avvalroq Turkiyada koronavirus bilan kasallanganlar soni rekord darajada oshgani, Belgiyada “omikron” shtammi tufayli yangi cheklovlar amalga kiritilgani, Niderlandiya hukumati “omikron” shtammi tarqalishi tufayli Yevropa Ittifoqi mamlakatlari orasida birinchi bo‘lib lokdaun joriy qilgani haqida xabarlar berilgandi.
Izoh (0)