AQSh armiyasi 1,5 mingga yaqin afg‘onistonlik bolani Kobuldan ota-onasisiz evakuatsiya qilgan

2021-yilning avgust oyida AQSh armiyasi tomonidan kamida 1450 nafar afg‘onistonlik bola ota-onasisiz Kobuldan evakuatsiya qilingan. Bu haqda CNN Amerikaning qochqinlar ishlari bo‘yicha boshqarmasi ma’lumotlariga tayanib xabar berdi.

Telekanal jurnalistlarining fikricha, bu bolalarning ko‘pchiligi o‘z oilasi bilan topisha olmasligi mumkin. “AQShda mingdan ortiq afg‘on bolalari uysiz qolayotgani odamni larzaga soladi”, — deydi Kaliforniyadagi afg‘on-amerikalik pediatr, doktor Sabrina Perrino e’lon qilingan ma’lumotlar bo‘yicha o‘z fikrlari bilan o‘rtoqlashar ekan.

AQShdagi bolalar huquqlari faollarining aytishicha, bolalarning aksariyati Afg‘onistondan oilasi bilan birga qochishga uringan, biroq chet el qo‘shinlari tomonidan amalga oshirilgan evakuatsiya chog‘idagi chalkashliklarda ota-onasini yo‘qotib qo‘ygan. Boshqalari esa 26-avgust kuni Kobul aeroportida 200 ga yaqin odamni halok qilgan portlash oqibatida oilasi bilan aloqani yo‘qotgan.

Rasmiy ma’lumotlarga ko‘ra, ota-onasiz AQShga olib ketilgan 1450 nafar bolaning mutlaq ko‘pchiligi amerikalik qarindoshlarining oilasida qo‘nim topgan yoki avgust oyida ular bilan birga Kobulni tark etishga muvaffaq bo‘lgan qarindoshlarinikida yashay boshlagan.

Shu bilan birga, Amerika rasmiylariga ko‘ra, bolalarning bir qismi afg‘onlar va xorijliklarni mamlakatdan evakuatsiya qilish bo‘yicha xalqaro operatsiya yakunlanganidan so‘ng Afg‘onistonni tark etishga muvaffaq bo‘lib, AQShdan boshpana topgan ota-onalariga qaytarilgan.

Ammo 250 ga yaqin afg‘on bolasi AQSh hukumati qaramog‘ida qolmoqda, deyiladi xabarda.

Xorijiy qo‘shinlarni olib chiqish bilan birga, Afg‘onistondan AQSh va NATO mamlakatlari fuqarolari, shuningdek, “Tolibon”ga qarshi kurashda G‘arbga yordam bergan afg‘onistonliklar evakuatsiya qilindi. “Tolibon” ta’qibidan qo‘rqqan minglab afg‘onlar uchib ketishni istagan.

Evakuatsiya ishlarining yaxshi tashkil qilinmagani va vahima tufayli tadbirlarda o‘nlab odamlar halok bo‘ldi va yaralandi. Xususan, 16-avgust kuni ertalab ular reyslardan birortasiga o‘tirish uchun uchish maydoniga bostirib kirgan va yerda turgan samolyotlarga osilib chiqishga harakat qilgan. Hodisa oqibatida o‘nga yaqin kishi halok bo‘lgan.

31-avgust kuni “Tolibon” talabiga ko‘ra, evakuatsiya yakunlandi va barcha xorijiy harbiylar Afg‘onistonni tark etdi. AQSh Markaziy qo‘mondonligi rahbari, general Kennet Makkenzining aytishicha, ikki hafta ichida uning qo‘l ostidagilar Kobuldan 79 mingdan ortiq tinch aholini, jumladan, 6 ming amerikalik va 73,5 mingdan ortiq Afg‘oniston fuqarolari va uchinchi davlat vakillarini evakuatsiya qilishga muvaffaq bo‘lgan. Hammasi bo‘lib xorijiy armiya bo‘linmalari 123 ming xorijlik va afg‘onistonliklarni Kobuldan harbiy transport samolyotlari bilan evakuatsiya qilgan. 31-avgustdan keyin Amerika Qatar vositachiligida 3 mingdan ortiq afg‘onlar va o‘z fuqarolarini Afg‘onistondan olib chiqishga muvaffaq bo‘lgan.